Një tragjedi ka ndodhur pranë resortit Hurgada në Detin e Kuq të Egjiptit, ku gjashtë turistë kanë humbur jetën pas fundosjes së një nëndetëseje turistike. Media shtetërore raportoi se Konsullata Ruse ka konfirmuar se 45 shtetas rusë ndodheshin në nëndetëse në momentin e aksidentit, raporton Gazeta Sinjali.
Konsullata e Rusisë në Hurgada njoftoi se nëndetësja po transportonte 45 turistë, përfshirë fëmijë, dhe katër prej tyre kanë humbur jetën. Sipas të dhënave të para, shumica e udhëtarëve janë shpëtuar dhe janë dërguar në hotele dhe spitale të Hurgadës.
Në përputhje me informacionet e medias shtetërore ruse, Ria Novosti, burime nga shërbimet e emergjencës të Egjiptit njoftuan për vdekjen e “pesë të huajve dhe një shtetasi egjiptian”.
Përveç viktimave, janë raportuar edhe 19 të lënduar, të cilët janë transportuar menjëherë në spitalet afër zonës së ngjarjes. Autoritetet egjiptiane kanë nisur hetimet për të përcaktuar shkakun e fundosjes së nëndetëses.
Hurgada, një nga destinacionet më të njohura turistike në Egjipt, është e njohur për shkëmbinjtë koralorë dhe ishujt e saj, duke tërhequr turistë nga e gjithë bota.
Sektori i turizmit është një nga më të rëndësishmit për ekonominë e Egjiptit, duke kontribuar në më shumë se 10% të Bruto Prodhimit të Brendshëm të vendit.
