Avokati Tomë Gashi ka njoftuar se është bërë pjesë e ekipit të mbrojtjes së kryeshefit të KEK-ut, të arrestuar nën dyshimet për korrupsion, Nagip Krasniqit.
Ai ka ngritur dyshime se Prokuroria po kalkulon në mënyrë të padrejtë duke thënë se nën këtë ndikim po bie edhe Gjykata.
“Nga sot po i bashkohem ekipit mbrojtes te z. Nagip Krasniqit. Ne, ekipi mbrojtes, se shpejti do te paraqesim ankese ne Gjykaten Supreme te Kosoves, e cila duhet ta liroje z. Krasniqin nga paraburgimi i padrejte, i panevojshem, e i kunderligjshem!”, ka shkruar Gashi në Facebook.
“Sa me shpejt qe Nagipi lirohet, aq me shpejt një padrejtësi ndaj tij përmirësohet!”, ka shkruar tutje ai.
Ndryshe, Mbrojtësi i kryeshefit të pezulluar të KEK-ut, Nagip Krasniqi, avokati Virtyt Ibrahimaga, njofton se sot ka pranuar vendimin e Gjykatës së Apelit për lënien në paraburgim të klientit të tij.
Sipas dosjes së prokurorisë, që e ka siguruar Kallxo.com, Krasniqi më 26 janar 2023, kishte lidhur kontratë të dëmshme në kundërshtim me Ligjin e Prokurimit Publik duke shkelur nenin 7, nenin 35 par.3, nenin 35 par. 2.1(iii), dhe nenin 57 par.2 të këtij ligji, ashtu që duke vepruar me tenderin KEK-23-130-5-1-5, i emërtuar si “Riparimi kapital emergjent i kaldajës blloku A5 ”, me procedurë të negociuar pa publikimin e njoftimit për kontratë, ka lidhur kontratë me kompaninë Litwin SA, me çmim prej 3.,495,392.42 euro, duke ndryshuar kushtet e veçanta të kontratës.
