Dejan Stankoviq ka thënë se ndihet krenar që është cigan, pasi tifozët e Romës e fyenë atë në baza racore gjatë disfatës së skuadrës së tij Sampdoria 3:0 të dielën mbrëma.
Ish-mesfushori i Crvena Zvezdës, Lazios dhe Interit Stankoviq ishte cak i thirrje cigan nga tifozët vendas, derisa ndërhyri trajneri i Romës Jose Mourinho që iu kërkoi të ndaleshin.
Fjala italiane për cigan shpesh përdorët nga pjesë të përkrahësve të futbollit si fyerje raciste për lojtarët nga Ballkani dhe Evropa lindore, pavarësisht cilës etni i përkasin.
Duke folur pas ndeshjes, trajneri serb tha se nuk ua vuri veshin thirrjeve të tilla dhe se ndihet krenar për atë që është.
“Jam krenar që jam cigan. Nuk ndihem i fyer nëse më thërrasin ashtu, dhe Jose e di këtë”, tha Stankoviqi për DANZ.
“Nuk e kuptova çfarë ndodhi derisa loja po zhvillohej, por e falënderoj Mourinhon që më doli krah”, shtoi ai.
Stankoviqi e fitoi tripletën, Serie A, Kupën e Italisë dhe Ligën e Kampionëve, me Interin nën udhëheqjen e Mourinos më 2010.
Tani, ai po kalon nëpër kohë të vështira si trajner i Sampdorias, e cila është e parafundit në tabelën e Serie A, 10 pikë larg zonës së shpëtimit, pasi e pësoi disfatën e 19-të këtë sezon.
