Një Benz E Class ngjyrë e zezë ndalon para lokalit “Neë Focus Lounge” në Tiranë. Nga dritarja e makinës tyta e një Kallashnikovi drejtohet nga një tavolinë e lokalit. Në orën 16.15 minuta zona e Don Boskos është plot me njerëz.
Breshëritë e armës që derdhen drejt lokalit, që nga makina shkaktojnë kaos në të gjithë zonën. Mjeti largohet me shpejtësi duke lënë pas në lokal njerëz të terrorizuar. Mes tyre, një i vrarë dhe disa të plagosur.
Disa orë më pas, viktima identifikohet si Erjon Çela, 35 vjeç. I plagosur ka mbetur Blerim Çela vëllai i tij. Policia thotë se ky është rëndë në spital, pasi ka plagë në këmbë dhe në fytyrë. I plagosur ka mbetur edhe daja i viktimës, Edmond Crroj.
19-vjeçari Azbi Selmanaj kamarier i lokalit ka marrë plagë në shpatull, ndërsa Arben Dani, 46 vjeç ka mbetur i dëmtuar në këmbë.
Atentatorët kanë kthyer makinën në vend dhe janë larguar menjëherë drejt Spitalit të Traumës.
Ende nuk dihet asgjë mbi arsyet e atentatit, pasi të gjithë të plagosurit rezultojnë të jenë pa precedentë penalë. Policia nuk ka ende asnjë informacion për atentatorët dhe pas verifikimit të targave ka rezultuar se mjeti ishte pajisur me targat e një makine tjetër. Ndërkohë në zonën e Don Boskos pas atentatit rrugët kanë rënë në heshtje./Lapsi.al
