Në orët e mëngjesit të sotëm, në Qendrën e trajnimit në Korporatën Energjetike të Kosovës në Obiliq, janë dëgjuar të shtëna me armë zjarri. Dikush dyshohet ta ketë vrarë një qen, që u gjet i ngordhur në parkingun e kësaj qendre, raporton Gazeta Sinjali.
Burimet e Sinjalit kanë bërë me dije se akoma nuk dihet se kush ka gjuajtur dhe cilat kanë qenë rrethanat e rastit, por qeni është gjetur në parking dhe dyshohet të jetë qëlluar nga arma. Posa punëtorët e sigurimit fizik kanë dalë në vendin e ngjarjes, e kanë njoftuar Policinë, me ç’rast një njësi policore ka intervenuar.
Sipas informacioneve të para, në lokacionin ku ka ndodhur rasti nuk është gjetur asnjë gëzhojë apo prova të tjera, që do të shfrytëzoheshin si dëshmi në lidhje me rastin.
Pasi Prokurori i Shtetit është vënë në dijeni për rastin, ka urdhëruar inicimin e rasteve si “Shkaktimi i rrezikut të përgjithshëm”, “Mbajtja në pronësi, kontroll ose posedim të paautorizuar të armëve” dhe “Përdorimi i armës apo mjetit të rrezikshëm.”
