Arben Taravari, ka dhënë dorëheqje nga posti i Ministrit të Shëndetësisë.
Taravari këtë hap e kishte paralajmëruar një ditë më parë.
“Detyrën që e mora me këtë funksion e kam ushtruar me përkushtim të plotë, transparencë dhe ndjenjë përgjegjësie ndaj qytetarëve dhe shtetit. Këtë vendim e kam marrë pas një vlerësimi të kujdesshëm personal dhe profesional, duke besuar se ky hap është në interesin më të mirë të institucionit dhe të parimeve të mia personale”, deklaroi ai shkruan Alsat-M transmeton Klankosova.tv.
Dorëheqja e tij, pasi të pranohet nga kryeministri, pritet të kalojë në procedurë në Kuvend.
“Akoma nuk kemi asnjë informacion ose paralajmërim. Kur të marrim dorëheqjen me shkrim, atëherë sipas rregullores do të presim propozim nga Kryeministri që të konstatohet dorëheqja dhe më pas kalojmë në procedurën e caktimit të ministrit të ri. Flasim për situata hipotetike”, tha Afrim Gashi, Kryetar i Kuvendit.
Pas konstatimit të dorëheqjes së Taravarit, VLEN është e bindur se pozitat që i kanë takuar ASH-së në ekzekutiv do të mbushen nga VLEN.
Zëvendëskryeministri Izet Mexhiti, thotë se nuk është biseduar që VMRO-DPMNE-ja të marrë Shëndetësinë.
“Fillimisht duhet ta konstatojmë dorëheqjen. Ajo që është e rëndësishme, të gjitha pozicionet që i ka Aleanca për Shqiptarët, do të mbeten në kuadër të VLEN-it. Do të bëjmë analizë, do t’i japim më të mirët dhe më të përgatiturit për ato pozicione”, u shpreh ai.
Taravari një ditë më parë njoftoi dorëheqjen e tij, por siç tha për MIA, funksionarët e tjerë do të shkarkohen. Për Mexhitin kjo tregon se Taravari nuk është në një vijë me strukturat e partisë.
“Kjo tregon që pjesa dërmuese brenda Aleancës për Shqiptarët që në themelim ka qenë antipod i BDI-së, nuk pajtohen me qëndrimin e kryetarit të partisë. Ka marrë rrugë të gabuar dhe është evidente që çdo ditë ka largime, ka paraqitje të mendimeve ndryshe nga funksionarë të ndryshëm. Kjo tregon që kryetari nuk është në vijë me anëtarësinë dhe me strukturat e partisë”, theksoi Mexhiti.
ASH-ja në qeveri përfaqësohet me ministrin e Shëndetësisë, Zëvendëskryeministrin për qeverisje të mirë, zëvendësministrin e Bujqësisë dhe zëvendësministrin e Mbrojtjes.
Funksionarë të tjerë të eshalonëve më të ulëta pritet po ashtu të shkarkohen.
