Kryetari i Nismës Socialdemokrate, Fatmir Limaj, është në takim me kryetarin e PDK-së, Memli Krasniqi.
Burime të Klankosova.tv bëjnë të ditur se ky takim është realizuar me ftesë të të parit të PDK-së.
Temë e diskutimit në këtë takim, sipas burimeve të Klanit, mësohet të jetë ndërtimi i ndonjë koalicioni potencial të opozitës për formim të qeverisë, nëse Lëvizja Vetëvendosje si partia e parë e dalë nga zgjedhjet e 9 shkurtit, nuk arrin të formojë qeverinë e re.
Për takimin Limaj – Krasniqi, Klankosova.tv ka kontaktuar edhe Endrit Shalën, koordinatorin për media në Nismën Socialdemokratike, por i njëjti nuk ka pranuar të flasë për çështjen në fjalë.
Lëvizja Vetëvendosje ka dalë partia e parë nga zgjedhjet e 9 shkurtit, mirëpo nuk ka arritur ta përsëris rezultatin e 2021-ës, kur e vetme arriti të formonte qeverinë. Asaj do t’i duhet një partner qeverisës nga opozita, qoftë nga partitë shqiptare apo edhe nga ato jo-shqiptare.
Deri më tani, partitë opozitare, PDK, LDK dhe AAK kanë deklaruar në disa raste se nuk dëshirojnë të qeverisin bashkë me LVV-në.
Ndërkaq Fatmir Limaj i Nismës, që kësaj radhe garoi në një listë me AAK-në, zuri në befasi opinionin publik kur, pas zgjedhjeve, në një emision televiziv, refuzoi të thotë se ka vija të kuqe ndaj Vetëvendosjes apo partive opozitare për të ndërtuar qeverinë e re të dalë nga zgjedhjet e 9 shkurtit.
Limaj tha se sa i përket “çështjeve nacionale”, ai s’ka vija të kuqe.
“Kush t’më fton në tavolinë, unë shkoj ulna – për tema nacionale. Çka po të vyn një qeveri jo funksionale? Kurrë nuk hyj në një qeveri jofunksionale. As me opozitën nuk e përjashtoj që ulem”, kishte thënë Limaj në “DebatPlus” më 20 shkurt.
