Ndërmjetësuesi i BE-së, për dialogun Kosovë-Serbi, Miroslav Lajçak, ka bërë një diskutim të rëndësishëm për dialogun, me presidentin e Serbisë, Aleksandar Vuçiq.
Përmes një postimi në Twitter, ai ka bërë të ditur se takimi mes tyre është zhvilluar në Bratisllavë në margjinat e forumit ”GLOBSEC 2022”.
”Sot në Bratisllavë në margjina të GLOBSEC 2022, u takova me presidentin e Serbisë, Aleksandar Vuçiq. Ne patëm edhe një tjetër diskutim të rëndësishëm për dialogun”.
Edhe Vuçiq ka njoftuar për temat që ka diskutuar me ndërmjetësuesin e BE-së, derisa tha se biseda ishte “e hapur dhe e sinqertë” për situatën në rajon, “si dhe për të gjitha temat me interes për të vazhduar në mënyrë konstruktive dialogun me Prishtinën”.
Ndonëse një numër marrëveshjesh të Brukselit s’janë zbatuar nga ana e Serbisë, Vuçiq tha se “u dakordua” me Lajçakun “që përmbushja e detyrimeve nga Marrëveshja e Brukselit mbetet mesazhi kyç për çdo bisedë të mëtejshme”, duke shtuar se kanë analizuar atë që është arritur deri më tani.
“Ritheksova përkushtimin e plotë të Republikës së Serbisë për vazhdimin e këtij procesi dhe për përpjekjet për të arritur një zgjidhje kompromisi për të krijuar marrëdhënie më të mira ndërmjet serbëve dhe shqiptarëve”, ka thënë Vuçiq.
“Ne ramë dakord që bashkëpunimi rajonal, duke ruajtur paqen dhe stabilitetin, është e vetmja rrugë e drejtë për përparimin e vendeve të Ballkanit Perëndimor”
