Evidentimi ditor i rasteve të reja të dhunës në familje, është shndërruar në një rutinë të pandashme, pasi që çdo ditë e më shumë raportohen me dhjetëra raste në organet e rendit. Burra që rrahin gratë dhe vajzat e qytetarë që ushtrojnë dhunë ndaj prindërve, janë vetëm disa nga rastet e shpeshta të dhunës brenda familjes në vendin tonë, raporton Gazeta Sinjali.
Ndër shkaqet e dhunës së vazhdueshme, është edhe frika e viktimave për të denoncuar rastet, pasi që të njëjtat përballen me kërcënime të vazhdueshme nga të dyshuarit.
Burimet e Gazetës Sinjali brenda Prokurorisë kanë bërë me dije se gjatë ditës së djeshme një grua në Podujevë ka kërkuar ndihmën e Policisë, ku ka deklaruar se është viktimë e dhunës së shkaktuar nga bashkëshorti i saj.
Bazuar në dëshminë e 29-vjeçares, i shoqi me të cilin ka tre fëmijë, vazhdimisht ka ushtruar dhunë psikike dhe fizike ndaj saj dhe e kishte kërcënuar se do ia vrasë vëllain nëse e denoncon në Polici.
I dyshuari jeton jashtë vendit, por edhe që atje nuk i ndal mesazhet me përmbajtje kërcënuese, të cilat kanë ngjallur frikë dhe shqetësim te viktima.
Viktima ka refuzuar që të dërgohet në strehimore, teksa me urdhër të prokurorit është iniciuar rasti ‘Dhunë në familje’, ndërsa veprimet tjera ligjore do merren posa të sigurohet prezenca e të dyshuarit për intervistim.
