Ish-komandanti i Përgjithshëm i Ushtrisë Çlirimtare të Kosovës (UÇK), Sylejman Selimi, ka thyer heshtjen pas raportimeve të sotme nëpër media se kinse ai është intervistuar nga EULEX-i.
I kontaktuar nga Paparaci, Selimi ka mohuar se është marrë në pyetje nga misioni i EULEX-it në Kosovë. Kësisoj, ai i quajti të pavërteta shkrimet nëpër media mbi këtë temë
“Shkrimet në media se jam intervistuar nga EULEX-i nuk janë të vërteta”, tha ai të mërkurën për Paparacin.
Ndër të tjera, ish-komandanti i UÇK-së në Zonën Operative të Drenicës tregoi se sot gjata tërë ditës ka qenë i shoqëruar nga miqtë e tij.
Madje, ai u shpreh se askush nuk e ka kontaktuar atë që ta intervistojë.
“Sot gjithë ditën kam qenë me miq dhe askush nuk më ka kontaktuar për të më intervistuar”, shtoi Selimi.
Përndryshe, përveç pozitave të larta në UÇK, Selimi kishte qenë edhe komandant i Trupave Mbrojtëse të Kosovës dhe komandant i Forcës së Sigurisë së Kosovës, përgjatë viteve 2006-2011.
