Ministri i Punëve të Brendshme, Xhelal Sveçla dhe ai i Shqipërisë, Taulant Balla, kanë vizituar të hënën pikën e përbashkët të kalimit kufitar në Morinë, nga ku folën për problemin e pritjes me të cilin ballafaqohen mërgimtarët gjatë udhëtimit të tyre për në Kosovë.
Balla gjatë adresimit për media u pyet lidhur me anulimin e mbledhjes së të dy Qeverive, për të cilën nuk ka dashur të komentojë, duke thënë se ka kohë për të folur për problemet tjera që nuk lidhen me çështjen e vizitës të së hënës.
Ministri shqiptar i Punëve të Brendshme ka thënë se sikurse ai, edhe homologu i tij nga Kosova, duhet t’i zbatojnë marrëveshjet për të cilat janë dakorduar kryeministrat e dy vendeve.
“Mërgimtarët atje po presin për ne që ta zgjidhim këtë çështje dhe unë mendoj se do ta gjejmë zgjidhjen. Sa për çështjet tjera, kemi kohë të flasim dhe ajo që u takon dy ministrave është të zbatojnë marrëveshjet të cilat kryeministrat janë dakorduar”, ka thënë ai.
Për këtë çështje shkurtimisht ka folur edhe Sveçla, i cili ka thënë se ka opinion, mirëpo do ta adresojë në një rast tjetër.
“Është hera e dytë që jam këtu për disa ditë. Kam shumë opinion për këtë çështje që do të adresojmë në një rast tjetër”, është shprehur ai.
Arsyeja e kësaj vizite, sipas Ballës, është që të gjendet një zgjidhje se si t’u mundësohet mërgimtarëve që udhëtimi i tyre në Kosovës, përmes pikës së kalimit kufitar të Morinës, të zgjasë sa më shkurt.
“Kemi shumë marrëveshje të firmosura që duhet të zbatohen, por konkretisht ka një rritje të numrit të mërgimtarëve dhe jo vetëm, edhe të udhëtarëve të tjerë nga vende të ndryshme që udhëtojnë nga Shqipëria për në Republikën e Kosovës dhe për shkak se të gjitha targat do të duhet të pajisen me siguracion, kjo merr një kohë të caktuar, kemi bërë një përllogaritje me ekspertët dhe shqetësimi im është që sa kohë që mërgimtarët bëjnë me orë të tëra udhëtim nga e gjithë Evropa për t’u kthyer, është t’i gjejmë të gjitha mundësitë që gjatë udhëtimit të tyre në Kosovë përmes pikës së kalimit të pikës kufitare të Morinës, koha të jetë shumë e shkurtër, ose të gjejmë modalitetet se si t’i japim një zgjidhje, të pajisen me siguracion”, është shprehur ai.
