Peter Stano, zëdhënës i BE-së, është deklaruar rreth planit pesë pikësh të kryeministrit të Kosovës, Albin Kurti, për shtensionimin e situatës në veri të Kosovës.
Stano e ka konfirmuar se Josep Borrell, shef i diplomacisë së BE-së, e ka pranuar një letër nga Kurti, duke shtuar se Borrell do të përgjigjet si gjithnjë përmes “kanaleve të duhura”.
Tutje, ai ka thënë se ende nuk ka parë ndonjë hap nga Kurti për shtensionimin e situatës në veri.
“Deri më tani nuk kemi parë ndonjë hap të vendosur dhe të menjëhershëm nga kryeministri Kurti të nevojshëm për shtensionim të situatës.” – thuhet në përgjigjen e Stanos për gazetën Nacionale.
Tutje, ai ka përmendur zhvillimet e fundit në veri (arrestimin e serbit të dyshuar për sulmet në veri), duke thënë se esklaimi po vazhdon ende.
“Zhvillimet e fundit në veri të Kosovës vetëm sa dëshmojnë se përshkallëzimi ende vazhdon, dhe kjo është në kundërshtim me interesin e Kosovës dhe të gjithë popullit në Kosovë.
Ne ndamë me shtetet anëtare të BE-së një përmbledhje të masave që duhen marrë, nëse kryeministri Kurti nuk ndërmerr hapat adekuat dhe të menjëhershëm për të shtensionuar situatën dhe për të ulur tensionet.” – theksoi Stano, i cili deklaroi se Borrell është në kontakt të vazhdueshëm me liderët në regjion dhe me ata të shteteve anëtare të BE-së.
