Zëdhënësi i Bashkimit Evropian, Peter Stano, ka thënë se BE pret që Kosova dhe Serbia të fillojë sa më shpejt zbatimin e marrëveshjes së arritur më 18 mars në Ohër të Maqedonisë së Veriut.
Stano ka thënë se BE ka filluar që të funksionalizojë hapat e parë për zbatimin e kësaj marrëveshjeje.
“Ne kemi filluar nga ana jonë për të funksionalizuar hapat e parë, që do të thotë të fillojmë të rregullojmë pozicionin e përbashkët të Bashkimit Evropian kur bëhet fjalë për kapitullin 35 të negociatave për anëtarësim për Serbinë dhe për rastin e Kosovës”, tha zëdhënësi Stano, raporton DW.
Ndryshe, dialogu mes Kosovës dhe Serbisë vazhdon javën e ardhshme në Bruksel ku pritet të ketë takime në nivel kryenegociatorësh.
Besnik Bislimi i Kosovës dhe Petar Petkoviq i Serbisë janë ftuar nga ndërmjetësi i Bashkimit Evropian për të çuar përpara gjithçka që është arritur në Ohër dhe të fillojnë të bëjnë hapat e parë drejt zbatimit.
Ky është takimi i pari që nga 18 marsi, kur krerët e të dyja vendeve u pajtuan të zbatojnë planin e mbështetur nga perëndimi.
