Dhomat e Specializuara të Gjykatës me seli në Hagë sot kanë lëshuar një komunikatë për procesin ndaj ish-krerëve të UÇK-së, një ditë para nisjes së gjykimit ndaj tyre.
Teksa përshkruajnë detajet e akuzave, Specialja pretendon se subjekt i hetimit nuk është UÇK-ja, por individë.
”Secili prej të akuzuarve është akuzuar mbi bazën e përgjegjësisë penale individuale me gjashtë akuza për krime kundër njerëzimit: përndjekje, burgim, akte të tjera çnjerëzore, torturë, vrasje e paligjshme dhe zhdukje me forcë e personave. Gjithashtu kundër secilit prej të akuzuarve janë ngritur katër akuza për krime lufte: arrestim dhe ndalim i paligjshëm dhe arbitrar, trajtim mizor, torturë dhe vrasje e paligjshme”.
Mirëpo rezulton se kjo komunikatë e Gjykatës Speciale bie ndesh me faktet reale që vet ky institucion i ka krijuar.
Mjafton të lexohet pika 35 e aktakuzës ndaj krerëve të UÇK-së, me të cilën Specialja i konsideron të njëjtit, anëtarë të asaj që ajo i quan ”Ndërmarrje e Përbashkët Kriminale”.
”Anëtarë të tjerë të ndërmarrjes së përbashkët kriminale ishin Azem SYLA, Lahi BRAHIMAJ, Fatmir LIMAJ, Sylejman SELIMI, Rrustem MUSTAFA, Shukri BUJA, Latif GASHI dhe Sabit GECI, si dhe disa drejtues të tjerë politikë dhe ushtarakë të UÇK-së dhe PGoK-së, përfshirë anëtarë të tjerë të Shtabit të Përgjithshëm. ; ministrat dhe zëvendësministrat e PGoK-së; Komandantët e zonave të UÇK-së, zëvendëskomandantët e zonave dhe anëtarët e tjerë të shtabit komandues të zonës; komandantët e brigadës dhe njësive; komandantët dhe pjesëtarët e policisë dhe shërbimeve inteligjente të UÇK-së dhe PGoK-së; dhe ushtarë të tjerë të UÇK-së dhe zyrtarë të PGoK-së (së bashku me Hashim THAÇIN, Kadri VESELI, Rexhep SELIMI dhe Jakup KRASNIQI, kolektivisht, ‘Anëtarët e NPK’). Secili prej këtyre individëve, me veprimet ose mosveprimet e tij ose të saj, kontribuoi në arritjen e qëllimit të përbashkët”, pretendon organi i akuzës.
Të hënën, do të nisë gjyqi ndaj ish-presidentit të Kosovës, Hashim Thaçi, ish-kryeparlamentarëve, Jakup Krasniqi dhe Kadri Veseli, dhe ish-anëtarit të Shtabit të Përgjithshëm të Ushtrisë Çlirimtare të Kosovës, Rexhep Selimi, në Dhomat e Specializuara në Hagë.
Ata akuzohen për krime lufte dhe krime kundër njerëzimit, të cilat thuhet se janë kryer kundër pakicave etnike dhe rivalëve politikë nga marsi i vitit 1998 deri në shtator 1999. Ata janë deklaruar të pafajshëm për këto akuza.
Ndërsa sot, në Prishtinë pati marsh madhështor në kundërshti të këtij gjykimi që me fillim është konsideruar i padrejtë.
Marshi, i organizuar nga kjo platformë nisi në orën 14:00 nga sheshi “Zahir Pajaziti” në drejtim të sheshit “Skënderbeu”. Aty, veç Tashollit, fjalën e morën edhe përfaqësues që kanë shprehur përkrahje për këtë marsh.
Kryetari i Partisë Demokratike të Kosovës, Memli Krasniqi, tha se sot ballëlartë e me zemër plot po marshojnë krenarë “për ata që dikur marshuan drejt lirisë”.
“Marshojmë për të kërkuar drejtësi, për ata që nga nesër do të përballen më një proces gjyqësor, në të cilin nuk janë për shkak të emrave të tyre të përveçëm, por për shkak të epokës së lavdishme që përfaqësojnë”, tha ai.
Vajza dëshmorit Fatmir Fazlia, Flaka, tha se UÇK-ja nuk ka kryer krime dhe nuk “është organizatë kriminale, por organizatë çlirimtare”.
Bajram Çerkini nga Qendra Burimore për Personat e Zhdukur tha se ashtu siç u shpallën të pafajshëm Ramush Haradinaj e Fatmir Limaj nga Tribunali i Hagës, të pafajshëm do të shpallen edhe ata që sot po gjykohen në Hagë.
Në mënyrë të organizuar, mijëra qytetarë nga vende të ndryshme të Kosovës erdhën për të marshuar në kryeqytet.
“Historia jonë nuk mund të rishkruhet”, “Marshojmë për drejtësi” dhe “Drejtësi jopolitike”, ishin disa nga pankartat që protestuesit i mbanin në duar.
Gjykimi i ish-krerëve të UÇK-së ka hasur në kundërshtime të shumta në Kosovë, mbi bazat se ky proces është i njëanshëm, pasi që në të nuk përfshihen krimet e kryera nga serbët në territorin e Kosovës.
Aktualisht, në Gjykatën Speciale është duke vazhduar gjyqi edhe ndaj ish-pjesëtarit tjetër të UÇK-së, Pjetër Shala.
Ndërsa, në dhjetor të vitit të kaluar, Gjykata Speciale e kishte shqiptuar dënimin e parë për krime lufte. Ish-komandanti i Ushtrisë Çlirimtare të Kosovës, Salih Mustafa, është dënuar me 26 vjet burgim për vrasje të paligjshme, ndalim arbitrar dhe torturë.
Më herët, nga Dhomat e Specializuara në Hagë janë dënuar Hysni Gucati dhe Nasim Haradinaj, për pengim të administrimit të drejtësisë.
