E mërkura u karakterizua me përplasje mes Presidencës së Kosovës dhe Këshillit Prokurorial të Kosovës (KPK). Ishte vetëm një arsye dhe ka të bëjë me dekretimin apo jo të Blerim Isufajt si kryeprokuror i Shtetit.
Këshilli Prokurorial i Kosovës (KPK) ka kërkuar sot zyrtarisht nga presidentja Vjosa Osmani që ta dekretojë Blerim Isufajn në pozitën e Kryeprokurorit të Shtetit,.
Për më tepër, KPK-ja kërkoi nga presidentja që ta trajtojë me urgjencë procesin e dekretimit të Kryeprokurorit të Shtetit.
“Në kuadër të kompetencave kushtetuese dhe ligjore, Këshilli Prokurorial i Kosovës, njofton opinionin publik se sot iu ka drejtuar Zyrës së Presidentes të Republikës së Kosovës me kërkesë për dekretimin e Blerim Isufaj në pozitën e Kryeprokurorit të Shtetit”, ka thënë Këshilli Prokurorial në një njoftim për media.
Por i shpejtë qe reagimi nga zyra e shefes së shtetit. Bekim Kupina, këshilltar për media në Presidencë, e cilësoi si skandaloze dhe të pabazuar ligjërisht këtë kërkesë të KPK-së.
Ai tregoi se fillimisht janë njoftuar prej mediave për kërkesën e KPK-së, që ai e konsideron si ultimatum. Nga Presidenca thonë se KPK-ja po manipulon me të vërtetën.
Presidenca thotë se presidentja Vjosa Osmani pasi të shteren afatet në muajin prill, do ta marrë vendimin për çështjen e dekretimit. Ndër të tjera thuhet se Osmani nuk ka asnjë afat kushtetues apo ligjor rreth propozimit të KPK-së për kryeprokurorin e Shtetit.
Presidenca konsideron se kërkesa e KPK-së përmban pasaktësi faktike dhe ligjore dhe si e tillë “është manipulative”.
“Afatet për një kontestim të tillë përfundojnë në fund të muajit prill, prandaj Presidentja do ta marrë vendimin pas shterimit të këtij afati, sepse e kundërta do të ishte ndërhyrje në pavarësinë e sistemit të drejtësisë. Së treti, Presidentja nuk ka asnjë afat shprehimor kushtetues apo ligjor për të vendosur për propozimin e KPK-së për Kryeprokurorin e Shtetit. Për më tepër, konsiderojmë se Kërkesa e KPK-së përmban pasaktësi faktike dhe ligjore, ndaj si e tillë është manipulative”.
Për këtë çështje e cila tash e një kohë bukur të madhe po vazhdon të mbetet e pazgjidhur, Paparaci ka kontaktuar me vetë kryeprokurorin e Prokurorisë Speciale, Blerim Isufaj.
Pa dhënë detaje të tjera, Isufaj nuk deshi t’i komentojë zhvillimet e sotme as të KPK-së por as kundërpërgjigjen e Presidencës së Kosovës.
“Jo nuk i komentoj, pyetini ata që kanë thënë”, u shpreh ai shkurtimisht përmes telefonit.
Më 6 prill të 2022’s, Blerim Isufaj është votuar nga Këshilli Prokurorial i Kosovës për Kryeprokuror të ri të Shtetit.
Me 11 vota pro Blerim Isufaj është nominuar për Kryeprokuror të ri të Shtetit.
Organizatat e shoqërisë civile në Kosovë e kanë kundërshtuar procesin për zgjedhjen e Kryeprokurorit të Shtetit, duke kërkuar anulimin e këtij konkursi.
Aktualisht, pozitën e ushtruesit të detyrës së Kryeprokurorit të Shtetit që nga 22 prilli i kaluar, po e ushtron Besim Kelmendi.
