Një javë pasi serbët janë tërhequr nga institucionet e Kosovës, raportohet se në Zvicër ka pasur një takim mes Kosovës dhe Serbisë.
Gazeta zvicerane “NZZ am Sonntag”, ka njoftuar se në mes të nëntorit, Departamenti Federal i Punëve të Jashtme (FDFA) i Zvicrës ka pritur përfaqësues të të dy vendeve në Zvicër. “Një takim i tillë ka ndodhur një javë pas tërheqjes së serbëve nga institucionet kosovare”, konfirmon zëdhënësja e FDFA-së, Elisa Raggi. Për arsye konfidencialiteti, FDFA nuk dëshiron të thotë saktësisht se ku janë zhvilluar bisedimet.
FDFA thotë se ky takim nuk ishte një rast i izoluar. Që nga viti 2015, Zvicra ka mbështetur Bashkimin Evropian, i cili është përgjegjës për dialogun e normalizimit ndërmjet Kosovës dhe Serbisë, me instrumentet e veta plotësuese: “Departamenti për Paqe dhe të Drejtat e Njeriut ka organizuar takime të rregullta ku marrin pjesë përfaqësues të partive më me ndikim nga të dy vendet”, transmeton Demokracia.com.
Ky diskutim larg syrit të publikut është i rëndësishëm në mënyrë që përfaqësuesit e Kosovës dhe Serbisë të shkëmbejnë rregullisht pikëpamjet për çështjet politike dhe të ndërtojnë besim. “Kjo lejon kontakte të drejtpërdrejta diskrete, për shembull, për të parandaluar shpërthimin e dhunës”, thotë FDFA për NZZ. Përveç kësaj, idetë mund të testohen, të cilat më pas do të përfshihen në negociatat zyrtare.
Ndryshe, disa serbë lokalë në veri të Kosovës, më 10 dhjetor, kanë ngritur barrikada në rrugët që çojnë në dy pikat kufitare me Serbinë, Jarinjë dhe Bërnjak. Kjo ishte siç thanë ata, përgjigje ndaj arrestimit të ish-policit serb, Dejan Pantiq, nga autoritetet e rendit në Kosovë. Atij më vonë i është shqiptuar masa e paraburgimit prej një muaji. Pantiq dyshohet se organizoi “sulm terrorist” në zyrat e Komisionit Qendror të Zgjedhjeve në veri të Kosovës.
