Administratori i AlbKings, Edin Nevzadi u la nga shteti i Kosovës i lirë, jashtë burgu. Ai është regjistruar si shtetas i Serbisë. Në seancën e fundit nuk u paraqit në gjyq. Dhe bash në këtë kohë, në po të njëjtin aplikacion – Telegramin rus, është hapur edhe një grup tjetër që po kryen veprimtari të njëjtë kriminale: publikon materiale private e të dhëna të grave shqiptare. Insajderi sjell detajet
“Chat ON”. ky është mesazhi me të cilin ka rinisur aktivitetin edhe një grup sikurse dikur AlbKings.
Edhe ky në platformën ruse telegram. Për më pak se 24 orë ka grumbulluar afro 8 mijë burra shqiptarë.
Deri në 600 prej tyre vazhdimisht janë aktiv në të.
Hapja e këtij grupi vije në kohën kur administratori i AlbKings, Edin Nevzadi i iki drejtësisë kosovare.
U la pa masë paraburgimi, dhe më, Nevzadi – një shtetas i Republikës së Serbisë, nuk u paraqit në gjykatë.
Gjykata Themelore në Prishtinë, i kishte shqiptuar dënim me burgim prej 21 muajsh (1 vit e 9 muaj) dhe një gjobë prej 5000 eurosh, Florent Poroshticës, njërit nga administratorët e grupit “Albkings”.
Për veprën e parë, Poroshtica akuzohej se, në bashkëkryerje me të pandehurën E.S, me nofkën “Liderja”, kishte shpërndarë dhe lejuar shpërndarjen në grup nga ana e personave të tretë pa autorizim, fotografi dhe video të ndjeshme të 12 viktimave, si dhe të dhëna personale siç janë numrat e telefonave, emrat dhe mbiemrat, dhe kredencialet e tjera të këtyre të dëmtuarave.
Për veprën e “shantazhit”, Poroshtica akuzohej se kishte kërkuar nga viktimat, familjarët apo shoqëria e tyre mjete monetare për t’ua fshirë postimet denigruese, dhe përfitimi monetar nga kjo veprimtari kishte arritur në shumën totale prej 2,344.44 euro.
Në lidhje me rastin “Albkings”, ishte raportuar gjithashtu se Edin Nevzadi, i akuzuari i dytë në këtë çështje, kishte ikur në Serbi. Sipas burimeve, Nevzadi, pasi kishte pranuar fajësinë për veprën për të cilën ngarkohej, kishte braktisur territorin e Kosovës dhe deri atëherë kishte qenë i pa arritshëm për organet e drejtësisë. Nevzadi akuzohej për veprën penale të “shtrëngimit”.
Ish-administratori i “Albkings”, Edin Nevzadi, ishte arrestuar më 17 prill 2024 dhe ishte liruar nga paraburgimi në tetor 2024, pasi kishte pranuar fajësinë.
Sipas njoftimit të gjykatës, më 17 tetor 2024, ishte pranuar kërkesa e Prokurorisë Themelore për ndërprerjen e masës së paraburgimit ndaj Nevzadit, pas arritjes së marrëveshjes për pranimin e fajësisë. Ai kishte dhënë adresën e saktë të vendqëndrimit në Kosovë dhe kishte premtuar se do të paraqitej para organet e drejtësisë çdo herë që do t’i kërkohej.
Prokuroria Themelore në Prishtinë, më 27 janar, kishte njoftuar ngritjen e aktakuzës ndaj Florent Poroshticës, Edin Nevzadit dhe E.S. lidhur me rastin e grupit famëkeq “Albkings”.
Pritet që të ketë edhe një epilog për të arrestuarit e tjerë, përfshirë ata që janë ende nën hetim.
