Kosova po e zhvendos ambasadën e saj në Londër në një rezidencë prej 6.5 milionë funtesh apo 7.41 milionë euro në Hyde Park, dikur në pronësi të komedianit Spike Milligan, raporton e përditshmja britanike “The Telegraph“.
Prona e artit dhe artizanatit në Bayswater është blerë nga Kosova pas një marrëveshjeje të rënë dakord nga ambasadori kosovar Ilir Kapiti. Ambasada e Kosovës aktualisht ndodhet në rrugën “John Street” në Holborn.
Milligan dhe shoku i tij, Eric Sykes blenë pronën prej 5697 metrash katrorë në vitin 1962, duke e bërë atë selinë e kooperativës së tyre të komedisë “Associated London Scripts”.
Skenaristit të Doctor Who, Terry Nation, i lindi ideja për Dalekët ndërsa punonte në katin e dytë të ndërtesës dhe u përdor nga Dennis Spooner për të hartuar skenarë për seritë Thunderbirds dhe Stingray.
Milligan – bashkë-krijuesi i The Goon Show dhe autori i “Adolf Hitler: My Part in his Downfall” – ia shiti Sykes hisen e tij të rezidencës në fillim të viteve të ’70-ave, i cili vazhdoi të punonte në zyrën e saj të katit të parë deri shumë shpejt para vdekjes së tij në vitin 2012. Më pas prona i kaloi familjes Sykes.
Rezidenca, e cila është ndërtuar në vitet 1890, ka një sërë dhomash të mëdha në katin e parë dhe të parë, tavane të larta dhe dritare të larta dhe ndodhet në një nga zonat më të kërkuara të ambasadave.
Stafi i ambasadës kosovare synon të zhvendoset në ndërtesë pasi të përfundojë puna e rinovimit. Marrëveshja u organizua nga Beauchamp Estates.
Gary Hersham, drejtor themelues, tha se “kjo shtëpi e madhe në qytet ka një histori të gjatë të përdorimit për zyra dhe për banim, duke e bërë transformimin e saj në një ambasadë një hap logjik”.
“Hapësira e bollshme e brendshme dhe vendndodhja në qendër, në pragun e Hyde Park dhe vetëm një udhëtim të shkurtër deri në Buckingham Place, e bëjnë atë një vend të përsosur për një mision diplomatik”.
Ambasada e Kosovës nuk iu përgjigj kërkesës për koment.
