Ministrja e Energjisë së Shqipërisë, Belinda Balluku ka thënë se kryeministri i Shqipërisë, Edi Rama, gjatë ditës së sotme ka lënë një porosi për t’i bërë një zgjidhje Kosovës,
Balluku tha se Shqipëria do të ndihmojë Kosovën me energji elektrike gjatë dative 31 dhjetor dhe 1 janar.
“Kryeministri Rama ka lënë porosi të veçantë gjatë ditës së sotme sa i përket përballimit të krizës energjetike në Republikën e Kosovës gjatë datave 31 dhjetor dhe 1 janar. Kemi angazhuar të gjitha burimet njerëzore, specialistët tanë së bashku me specialistët e Korporatës Elektroenergjetike për të gjetur një zgjidhje dhe për të furnizuar Kosovën në këto ditë shumë të rëndësishme”, tha ministrja shqiptare.
Ajo poashtu tregoi se sa megavat orë do të jepen Kosovës për këto dy ditë, teksa theksoi se këto megavat orë do të jepen pa asnjë efekt financiar.
“Pas një dakordësie që kemi pasur me drejtuesit e KEK-ut, kemi arritur që të sigurojmë 3600 megavat orë për datën 31 dhjetor dhe 4800 megavat për datën 1 janar. Këto megavat orë, që do të jepen në formën e depozitimit, pa asnjë efekt financiar për Republikën e Kosovës, duke kërkuar që t’i rikthehen Republikës së Shqipërisë gjatë sezonit veror”, tha Balluku.
