Mediat në Serbi kanë publikuar një skandal të madh ku është hetuar se një listë prej 14 mijë e 310 profileve të rrejshme të lidhura me Partinë Progresiste Serbe që udhëhiqet nga Aleksandër Vuçiç, angazhohen në mënyrë automatike në Facebook, Instagram, Twitter dhe TikTok në mbrojtje të presidentit serb dhe sulme ndaj kundërshtarëve të tij.
Robotët e lidhur me partinë në pushtet dërgojnë mesazhe dhe komente që lavdërojnë presidentin Aleksandër Vuçiç dhe politikat e tij.
Në anën tjetër ata sulmojnë dhe ofendojnë ata që nuk ndajnë mendime të njëjta, sidomos opozitën dhe demonstruesit serbë që kanë disa javë që kanë dalë në rrugë dhe kërkojnë largimin e Vuçiç-it nga skena politike.
Lista përmban emra konkretë të “botëve” dhe janë identifikuar 3162 prej tyre që “profesionalisht” e kryejnë këtë punë paralelisht me punësimin apo funksionin e tyre të përhershëm në shoqëri.
Shumë prej tyre janë punonjës të administratave të qytetit, ministrive dhe institucioneve të tjera shtetërore apo vendore, drejtorë shkollash, profesorë fakulteti dhe njerëz të tjerë financimi i të cilëve bazohet në buxhetin e shtetit.
Sipas raportimeve të mediave serbe, disa prej tyre marrin tarifa për këtë shërbim për t’i ndihmuar ata të kapërcejnë inflacionin dhe situatën e vështirë sociale.
“Bots” ndahen në katër kategori.
Të parët janë robotët klasikë, detyra e të cilëve është të shkruajnë komente pozitive dhe mbështetëse për SNS dhe lëvizjet politike të Vuçiç-it. Kategoria e dytë janë të ashtuquajturat super forca speciale, kryesisht të punësuara në shërbimet shtetërore dhe publike, të cilat reagojnë në situata emergjente dhe mund të shprehin dashuri për liderin ose urrejtje për armiqtë.
Kategoria e tretë janë “urrejtësit” përgjegjës për fyerjen, nënçmimin, “ekspozimin” dhe talljen e atyre që kanë mendime të kundërta me Vuçiç-in dhe politikën e tij. Grupi i katërt janë “tifozët” që kanë për detyrë vetëm lavdërimin dhe promovimin e kultit të personalitetit të Aleksandër Vuçiç-it.
Disa vite më parë, rreth 8 mijë e 500 llogari që lavdëronin SNS dhe Vuçiç-in u hoqën nga Twitter. Më shumë se 40 milionë cicërima u publikuan nga ato llogari.
