Një gjendje e jashtëzakonshme është shpallur në qytetin e New Yorkut pasi stuhitë e forta sjellin përmbytje të shpejta.
Shumë prej sistemeve të metrosë, rrugëve dhe autostradave të qytetit janë përmbytur, ndërsa të paktën një terminal në aeroportin LaGuardia u mbyll të premten.
Deri në 20 cm shi ra në disa pjesë të qytetit dhe disa inç të tjerë priten më vonë të premten, thanë sinoptikanët.
“Kjo është një stuhi e rrezikshme, kërcënuese për jetën,” tha guvernatorja Kathy Hochul.
“Unë po shpall një gjendje të jashtëzakonshme në të gjithë qytetin e New Yorkut, Long Island dhe Luginën Hudson për shkak të reshjeve ekstreme që po shohim në të gjithë rajonin,” tha Hochul në X, i njohur më parë si Twitter.
Ajo u bëri thirrje njerëzve të ndërmarrin hapa për të qëndruar të sigurt dhe “të mos përpiqen kurrë të udhëtojnë në rrugët e përmbytura”.
Nuk është raportuar për vdekje apo lëndime kritike.
Një gjendje e jashtëzakonshme u shpall gjithashtu në qytetin Hoboken të New Jersey, pikërisht përtej lumit Hudson nga qyteti i New Yorkut.
Fotot dhe pamjet video tregonin njerëz që kalonin nëpër ujë që arrinte deri në gjunjë, ndërsa rrugët dhe metrotë u goditën nga shiu i madh. Disa video të postuara në mediat sociale dukeshin se tregonin ujë që derdhej nga tavani dhe muret e stacioneve të metrosë dhe në platformat e përmbytura.
Qyteti i New Yorkut ka pasur gati 14 inç shi deri më tani këtë muaj, duke e bërë atë shtatorin më të lagësht që nga viti 1882, sipas të dhënave të Shërbimit Kombëtar të Motit./21Media
