Fehmi Kupina tashmë është shkarkuar nga pozita e Kryesuesit të Asamblesë Komunale në Prishtinë, derisa LDK ka arritur ta rikthejë shumicën duke e stabilizuar kësisoji qeverisjen komunale në kryeqytet.
Prej sot, kryetari i Prishtinës Përparim Rama do ta ketë një gajle më pak. Partia në të cilën bën pjesë, LDK-ja, do të vazhdojë të jetë pjesë e shumicës në Kuvendin Komunal.
Gjatë ditës së sotme u thirr një seancë e jashtëzakonshme dhe pikë e rendit të ditës ishte edhe shkarkimi i Fehmi Kupinës.
Ky i fundit kishte dhënë dorëheqje nga LDK-ja para tri jave derisa në Kuvendin e Komunës së Prishtinës po ndodhte një ‘dramë’ politike. Vetëvendosje, AAK dhe Nisma – tri partitë opozitare – ishin bërë bashkë për të shkarkuar aksionarët e ndërmarrjeve publike. Por, ky akt ishte më shumë se kaq. Këto parti të bëra bashkë dukej se ishin bërë edhe shumica e re në kuvendin e Prishtinës.
E megjithatë, gjërat ndërruan shpejt dhe LDK-ja e riktheu shumicën. Përveç shkarkimi të Kupinës, sot u anulua edhe vendimi i mëhershëm për aksionarët.
Pas dorëheqjes nga LDK, Kupina kishte thënë se do të vepronte si i pavarur. Ai ishte emëruar në pozitën e Kryesuesit të Kuvendit Komunal më 5 janar të vitit 2022, ose vetëm pak javë pas fitores së Përparim Ramës ndaj Arben Vitisë në balotazhin e nëntorit 2021.
Kupina nuk kishte dhënë ndonjë arsye specifike pse po jepte dorëheqje nga Lidhja Demokratike. Por, veprimi i tij e kishte kërcënuar stabilitetin komunal.
Nga LDK nuk kanë bërë të ditur se kush do të jetë emri i ri që do të propozohet për kryesues të Asamblesë Komunale deri më tash.
