Në adresimin e tij para publikut serb gjenerali serb Milan Mojsilovic përsëriti qëndrimin e shtetit serb se përndjekja e pretenduar e serbëve në Kosovë është e padurueshme tashmë dhe nëse nuk do të ketë hapa nga KFOR në mbrojtje të serbëve do të jetë ushtria serbe ajo që do të ndërhyjë.
Mojsilovic në orë 16:00 të premten u paraqit para mediave në konferencë për shtyp ku lexoi komunikatën dhe ngriti nivelin e tensionit edhe më tutje në mes të Kosovës dhe Serbisë ku u la të nënkuptohet se kjo është në një formë apo tjetër vërejtja dhe lutja e fundit siç e quajti për institucionet ndërkombëtare në Kosovë për të ndalur siç e quan ‘regjimin prishtinas të Albin Kurtit’.
“Në përputhje me të gjitha faktet dhe për hir të bashkëpunimit korrekt dhe profesional, e njoftova komandantin e KFOR-it se po i përcjellim me ankth ngjarjet dhe kërkojmë që të merren masa urgjente për mbrojtjen e popullit serb dhe të drejtën e tij për mbijetesë. Kjo është lutja jonë për njësitë e KFOR-it, për të gjithë KFOR-in dhe institucionet e tjera ndërkombëtare në Kosovë e Metohi”, tha Mojsilovic.
Pas hyrjes gjenerali serb e bëri të qartë se po shqyrtohet edhe mundësia e ndërhyrjes ushtarake sipas tij pasi është bashkësia ndërkombëtare që nuk po respekton marrëveshjet dhe Serbia ajo që do të detyrohet të ndërhyjë sipas tij.
“Ushtria serbe përmbush të gjitha detyrimet e saj ligjore ndërkombëtare që dalin nga Rezoluta 1244, marrëveshja teknike ushtarake dhe të gjitha procedurat e përkohshme për regjimin e punës përgjatë vijës administrative. Por sot është e qartë se komuniteti ndërkombëtar nuk po i përmbush detyrimet e veta. Ushtria në përputhje me Kushtetutën e Serbisë dhe Kartën e OKB-së nëse merr urdhër nga komandanti suprem, do t’i kryejë të gjitha detyrat e tij në lidhje me krizën e përgjithshme të sigurisë. Rroftë Serbia”, përfundoi fjalimin e tij gjenerali Mojsilovic.
