Shpërthimi i luftës është i mundur në Evropë, paralajmëroi shefi i Organizatës për Siguri dhe Bashkëpunim në Evropë (OSBE), Zbigniew Rau, ndërsa bisedimet filluan në Vjenë për përpjekjet për të ulur tensionet midis Rusisë dhe shteteve perëndimore.
Sipas dpa, përcjell Telegrafi, Rau, i cili është gjithashtu ministër i jashtëm polak, vuri në dukje grumbullimin aktual të trupave ruse pranë kufirit ukrainas.
“Duket se rreziku i luftës në zonën e OSBE-së tani është më i madh se kurrë në 30 vitet e fundit”, citohet të ketë thënë ai.
Duke iu drejtuar përfaqësuesve të 57 vendeve anëtare të OSBE-së, përfshirë Rusinë dhe Shtetet e Bashkuara, ai avokoi përdorimin e organizatës për të ulur tensionet rajonale.
Takimi pasoi bisedimet e krizës midis SHBA-së dhe Rusisë në Gjenevë të hënën dhe një takimi të rrallë midis NATO-s dhe Rusisë në Bruksel të mërkurën.
Nga këndvështrimi i NATO-s, numri i madh i trupave ruse të grumbulluara në kufi përbën një kërcënim sigurie për Ukrainën.
Moska, nga ana tjetër, e sheh veten të kërcënuar nga zgjerimi i NATO-s dhe kërkon zotime se vendeve si Ukraina dhe Gjeorgjia nuk do t’u jepet anëtarësimi në të ardhmen.
Kriza aktuale paraqiti “një sfidë për stabilitetin dhe sigurinë e sistemit evropian”, tha Rau.
Organizata ishte platforma e duhur për të diskutuar shqetësimet e sigurisë të disa shteteve dhe për të nisur masat e ndërtimit të besimit, tha ai, pa iu drejtuar drejtpërdrejt Moskës dhe Uashingtonit.
OSBE është i vetmi forum rajonal i sigurisë ku SHBA dhe Rusia ulen rregullisht në të njëjtën tryezë. Vëzhguesit e OSBE-së po monitorojnë gjithashtu situatën në Ukrainën lindore, e cila kontrollohet pjesërisht nga separatistët pro-rusë me mbështetjen e Moskës.
E delegati i SHBA-së në OSBE, Majkell Karpenter tha se forumi mund të jetë ideal për lehtësimin e tensioneve.
“Vetëm në OSBE mund të ulemi së bashku në të njëjtën tryezë, me zërat e të 57 shteteve pjesëmarrëse të barabartë, për të diskutuar mënyrat për të forcuar sigurinë në përputhje me parimet dhe angazhimet themelore, duke përfshirë respektimin e sovranitetit dhe integritetit territorial të shteteve pjesëmarrëse, paprekshmërinë e kufijve të njëri-tjetrit dhe kërcënimin apo mospërdorimin e forcës”, tha ai. /Telegrafi/
