Lideri i Aleancës për Ardhmërinë e Kosovës, Ramush Haradinaj, ka komentuar deklaratën e kryeministrit të vendit, Albin Kurti, i cili deklaroi se as ai s’mund t’i përfaqësojë Shtetet e Bashkuara të Amerikës e as ambasadori amerikan e Departamenti Amerikan i Shtetit s’mund ta përfaqësojnë Kosovës, raporton Gazeta Sinjali.
Përmes një postimi në faqen e tij zyrtare në rrjetin social Facebook, Haradinaj ka thënë se kërkuar llogari nga Kurti, duke pyetur se përse me çdo kusht kërkon ta bëjë Amerikën pjesë të problemit.
“Pse ai me çdo kusht kërkon që Amerikën ta bëjë pjesë të problemit kur ajo ishte dhe është pjesë e zgjidhjes. Pse Albin Kurti mundohet ta krijojë përshtypjen se ai mund të jetë viktimë e një “komploti ndërkombëtar”! Apo po provon që edhe njëherë ta luajë viktimën, si në vitin 2020!”, shkroi ai.
Tutje kreu i AAK-së thotë se detyrat dhe obligimet që bart pozita e kryeministrit janë të rënda dhe nëse Kurti s’arrin t’u bëjë ballë, fajin mos ta kërkojë askund por te vetja.
“Detyrat dhe obligimet e një kryeministri janë të rënda, aq më tepër në rastin e Kosovës, dhe nëse nuk mund t’u bësh ballë sfidave që t’i nxjerr koha përpara, fajin nuk mund ta kërkosh diku tjetër, pos te vetja!”, shkruan Haradinaj.
Sipas ish kryeministrit të vendit, Kosova nuk ka luksin të bëjë eksperimente duke u armiqësuar me partnerët strategjikë.
“Kosova nuk e ka luksin të bëjë eksperimente duke u armiqësuar me partnerët strategjikë por duhet të shtrohet e të rinisë një fazë tjetër bashkëpunimi. Kjo dmth se Kryeministri duhet të bëjë kthesë për 180 shkallë sepse është në drejtimin e gabuar! Ky vit nuk mund të vazhdojë me të njëjtat gabime, sepse me këtë kurs është vënë në rrezik edhe vet ekzistenca e shtetit”, tha lideri i AAK-së, Haradinaj.
