Senatori amerikan, Chuck Grassley, ka komentuar vizitën e presidentit të njësisë së Republika Sërpskas të BeH, Milorad Dodik, në Rusi pasi Gjykata e vendit lëshoi një urdhër arresti për të.
Grassley e krahasoi Dodikun me ish-presidentin sirian, Bashar al-Assad.
“Ashtu si Assadi i Sirisë, diktatori i mundshëm Dodik ikën në Rusi për strehë të sigurt. Ai do të përballet me drejtësinë në Bosnje dhe Hercegovinë për përpjekjen e tij të dështuar për të shkatërruar vendin dhe për të ndaluar integrimin në Evropë”, shkroi Grassley në X.
Senatori Grassley, së bashku me senatoren Jeanne Shaheen, po udhëheqin një nismë të Kongresit që kërkon një ndërhyrje urgjente diplomatike për të ndalur veprimet antikushtetuese në Bosnje dhe Hercegovinë. Kjo nismë, e mbështetur fuqimisht nga BiHUnited dhe organizatat partnere, thekson urgjencën e mbrojtjes së sovranitetit të Bosnjë dhe Hercegovinës.
Dodik, për të cilin është lëshuar një urdhër-arresti ndërkombëtar nga Gjykata e Bosnje dhe Hercegovinës, së pari udhëtoi në Izrael javën e kaluar në një përpjekje për të fituar mbështetje nga Benjamin Netanyahu.
Pasi vizita në Izrael nuk shkoi me sukses siç ishte planifikuar, ai u kthye në Beograd. Për disa ditë, vendndodhja e tij nuk dihej deri të hënën në mbrëmje, kur ai postoi në X se ishte në Moskë.
Madje në Moskë, Dodik ka njoftuar të jetë takuar me presidentin rus, Vladimir Putin, më 1 prill.
Pas takimit, kreu i RS shkroi në X se Putini i tha që Rusia do të avokojë për ndalimin e punës së institucioneve ndërkombëtare në Bosnje e Hercegovinë, përfshirë edhe punën e Përfaqësuesit të Lartë, Christian Schmidt.
“Rusia është garantuese e marrëveshjes së paqes dhe Putini e tha këtë në takim. Ai shtoi se, në këtë kuadër, Rusia do të avokojë për përfundimin dhe ndalimin e punës së institucioneve ndërkombëtare, veçmas të Përfaqësuesit të rremë të Lartë, ose, siç i referohet ai, Përfaqësuesit jolegjitim”, tha Dodiku.
Më 27 mars, Gjykata e Bosnjës i kërkoi INTERPOL-it të lëshojë një “njoftim të kuq” për Dodikun dhe kryetarin e Parlamentit të Republikës Sërpska, Nenad Stevandiq, të cilët dyshohen se kanë kryer veprën penale të “sulmit ndaj rendit kushtetues të Bosnje e Hercegovinës”.
Ky vendim u mor pasi Dodiku dhe Stevandiq u larguan nga Bosnja, duke shmangur procedurat e përcaktuara me ligj të kontrollit kufitar, në kohën kur ndaj tyre ishte lëshuar një fletarrestim qendror, që nënkupton se çdo agjenci policore duhet t’i dërgojë pranë gjykatës në Bosnje. /N1/REL/ Gazeta Papirus/
