Sekretari i Ministrisë së Shëndetësisë, Naim Bardiqi, ka njoftuar se nga sot është zgjedhur kryesues i Bordit Drejtues të Shërbimit Spitalor Klinik dhe Universitar të Kosovës (ShSKUK).
Ai në Facebook bëri të ditur se detyrat që i janë besuar, do t’i kryejë me përgjegjësi dhe nder.
“Nga sot Kryesues i Bordit të ShSKUK! Detyrat që më janë besuar, si gjithnjë do i kryej me përgjegjësi dhe nder. Falënderoj për besimin e dhënë; – Qeverinë, Ministrin e Shëndetësisë dhe Anëtarët e Bordit të ShSKUK”, shkroi ai.
“Gjithashtu për mbështetjen e vazhdueshme falënderoj miqtë, dashamirët, kolegë e familjarë”, shtoi ai.
Qeveria e Kosovës e ka emëruar bordin e ri të Shërbimit Spitalor Klinik Universitar të Kosovës (SHSKUK), më 26 prill. Bordi drejtues përbëhet nga shtatë anëtarë.
Dren Boshnjaku, përfaqësues nga QKUK, Tetore Olloni nga Stomatologjia, Rrezarta Bajrami nga IKSHPK, Besim Demolli nga Spitali i Përgjithshëm i Ferizajt, Vjosa Kadolli nga Shërbimi i Kujdesit Parësor, Naim Bardiqi si përfaqësues nga Ministria e Shëndetësisë dhe një ekspert i menaxhimit shëndetësor që zgjidhet përmes konkursit publik, janë anëtarët e rinj të Bordit drejtues të SHSKUK-së.
Ministri i Shëndetësisë, Arben Vitia kishte thënë atë ditë se si asnjë herë më parë, janë të orientuar drejt zbatimit të reformave, fuqizimit dhe profesionalizimit të sektorit të shëndetësisë.
“Bordi ka për detyrë mbarëvajtjen e të gjitha punëve të SHSKUK-së. Janë përgjegjës për përformancë profesionale dhe afarizmin financiar”, deklaronte Vitia.
Bordit të Shërbimit Spitalor Klinik dhe Universitar i ka skaduar mandati më datë 27 mars 2023.
Bordi i cili është emëruar më datën 27.03.2020, e të cilit tashmë i ka skaduar mandati, ka qenë me këtë përbërje: Aida Rexhepi, Agreta Gecaj-Gashi, Vjollca Kodolli, Xhevat Jakupi, Enver Gashi dhe një përfaqësues i MSH-së.
