Sekretari i Jashtëm i Mbretërisë së Bashkuar, David Lammy, ka shkuar për vizitë në selinë e KFOR-it ku është pritur nga komandanti i KFOR-it, Enrico Barduani, transmeton Gazeta Papirus.
Gjatë vizitës, KFOR tha se Barduani ndau pikëpamjet e tij për “situatën aktuale të sigurisë në të gjithë rajonin dhe nënvizoi përpjekjet e KFOR-it për të siguruar një mjedis të sigurt për të gjithë njerëzit që jetojnë në Kosovë dhe në mbështetje të dialogut të ndërmjetësuar nga BE-ja ndërmjet Prishtinës dhe Beogradit”.
“Gjeneralmajor Barduani uroi gjithashtu Sekretarin Lammy për kontributin e kahershëm të Britanisë së Madhe në KFOR dhe në stabilitetin rajonal”.
Lammy takoi një delegacion të kontingjentit britanik në Camp Film City, të cilin e vlerësoi për angazhimin e tyre të vazhdueshëm ndaj Operacionit Joint Enterprise.
KFOR-i përsëriti se vazhdon të zbatojë mandatin e tij – bazuar në Rezolutën 1244 të Këshillit të Sigurimit të OKB-së të vitit 1999 – për të kontribuar në një mjedis të sigurt për të gjithë njerëzit dhe komunitetet që jetojnë në Kosovë dhe lirinë e lëvizjes, në çdo kohë dhe në mënyrë të paanshme.
KFOR-i punon në koordinim të ngushtë me Policinë e Kosovës dhe Misionin e Bashkimit Europian për Sundimin e Ligjit në Kosovë (EULEX) në rolet e tyre përkatëse si reagues të sigurisë.
