Gazeta serbe Nova pretendon të ketë siguruar informacione që hedhin dritë mbi nenin 4 të Propozimit Evropian që shkaktoi shumë bujë ditëve të fundit. Çka thotë kjo gazetë?
Javën e kaluar, kryeministri i Kosovës Albin Kurti u shpreh se Vuçiq “do të kishte shkelur nenin 4 të Propozimit Evropian” pasi presidenti serb Vuçiq u shpreh se nuk do të pranonte asnjëherë që Kosova të ishte pjesë e OKB-së.
Pala serbe, siç edhe mund të kuptohet, ka tjetër interpretim të këtij neni.
Nova shkruan bazuar në dokumentet e siguruara se Kosova nuk do të kërkojë anëtarësim në Organizatën e Kombeve të Bashkuara pa miratimin eksplicit nga të gjithë pesë anëtarët e përhershëm të Këshillit të Sigurimit të OKB-së – Franca, Britania e Madhe, ShBA-ja, Rusia dhe Kina.
Dokumenti në fjalë, siç raporton Nova, është siguruar nga diplomatë që po provojnë të gjejnë zgjidhje për Planin e Zbatimit të Propozimit Evropian.
“Po provohet që të gjendet një zgjidhje për kundërshtimin e Serbisë për t’u pajtuar për pranimin e Kosovës në të gjitha organitatat ndërkombëtare, përfshirë OKB-në, që po interpretohet si njohje de fakto e pavarësisë,” – shkruan Nova.
Dokumenti në fjalë pretendohet se titullohet “Marrëveshja e rrugës së normalizimit mes Kosovës dhe Serbisë – Zbatimi i Nenit 4”.
Aty thuhet që ky propozim ishte i frymëzuar nga Traktati i Dy Gjermanive i vitit 1972, dhe që nuk ka të bëjë me njohjen reciproke por me bashkekzistencën dhe bashkëpunimin paqësor.
“Republika Federale e Gjermanisë kurrë nuk e ka njohur Republikën Demokratike të Gjermanisë dhe anasjelltas. Megjithatë, Traktati Bazë i 1972-s e bëri të mundur për dy Gjermanitë që ta pranonin realitetin e ekzistencës së palës tjetër. Kjo po ashtu lejoi shtetet perëndimore që të zhvillojnë raportet e tyre me RDGJ-në. Nëse Serbia dhe Kosova vazhdojnë me vendosmëri rrugën për t’iu bashkuar Bashkimit Evropian, normalizimi i plotë përmes njohjes reciproke do të ndodh së shpejti. Tash për tash, bashkekzistenca përmes raporteve paqësore, pavarësisht dallimeve, është e vetmja gjë që komuniteti ndërkombëtar po e kërkon nga Serbia dhe Kosova,” – thuhet në këtë dokument.
Sa i përket mospajtimeve rreth pikës 4, shkruhet si vijon:
“Refuzimi i Serbisë jo domosdoshmërisht është pengesë për anëtarësimin e Kosovës në OKB. Anëtarësimi i Kosovës në OKB varet ekskluzivisht nga miratimi formal i pesë anëtarëve të përhershën në Këshillin e Sigurimit të OKB-së.” – mes tjerash.
Aty i bëhen me dije Kosovës edhe disa çështje:
“Pranohet rëndësia e Rusisë dhe Kinës si lojtarë të fuqishëm gjeopolitikë, një gjest simbolik drejt Moskës dhe Pekinit. Adreson sensitivitetin e Serbisë sa i përket anëtarësimit të Kosovës në OKB. Kosova nuk përfiton asgjë duke ndjekur anëtarësimin në OKB pa miratimin eksplicit të pesëshes permanente. Me qasjen konstruktive të saj, Serbia merr favore nga Perëndimi.”
Më pas, aty theksohet që kundërshtimi i Serbisë jo domosdo mund të jetë pengesë e pranimit të Kosovës në OKB, derisa paralajmërohet edhe për pasoja serioze nëse ka qasje destruktive.
“Serbia mund të humbas gjithçka, përfshirë Kosovën dhe mbështetjen e nevojshme nga Perëndimi. Ky shënim i ri i thjeshtë në Aneks, që s’tregon tjetër pos asaj që dihet, mund të jetë politika siguruese e Serbisë,” – shkruhet në fund të paragrafit.
