Forcat kurde në Sirinë verilindore i kanë thënë BBC-së se mund të detyrohen të ndalojnë mbrojtjen e kampeve që mbajnë militantët e Shtetit Islamik dhe të afërmit e tyre. Forcat Demokratike Siriane kanë bërë të ditur se nuk kanë më kapacitet për të ruajtur këto kampe, për shkak të sulmeve të ushtrisë turke. Sipas informacioneve të “A2 CNN”, në njërin prej këtyre kampeve, Al Havl, ndodhen 13 shqiptarë.
Turqia ka kryer disa operacione në rajon, pas një sulmi me bombë në Stamboll ku gjashtë persona humbën jetën dhe më shumë se një duzinë u plagosën. Shteti turk fajëson forcat kurde për mbështetjen e terroristëve, gjë që ka acaruar edhe marrëdhëniet me Shtetet e Bashkuara.
Forcat Demokratike Siriane (SDF) përbëhen kryesisht nga militantë kurdë, të cilët SHBA i mbështet me armë. Ata kanë mohuar çdo përfshirje në sulmin në Stamboll.
Kreu i FSD-së, gjenerali Mazlum Abdi, i tha BBC-së se operacionet ushtarake të Turqisë do të ndihmonin në ringjalljen e grupit terrorist ISIS.
“Kjo do të çonte në një luftë të dytë civile në Siri dhe operacionet tona kundër ISIS do të ndërpriteshin. Ne luftuam dhe mundëm ISIS-in në bashkëpunim me koalicionin ndërkombëtar, ndërsa tani Turqia do të minojë të gjithë përpjekjen,” tha ai.
Al-Hawl është kampi më i madh ku mbahen militantët e ISIS dhe familjet e tyre. Siç raporton BBC, mbi 50,000 njerëz jetojnë atje, mbi 60 për qind e tyre gra dhe fëmijë.
Abdi paralajmëroi se nëse sulmet turke vazhdojnë, kjo do të ndikonte drejtpërdrejt në aftësinë e forcave të tij për të siguruar kampin.
“Ne do të jemi të zënë me mbrojtjen e njerëzve tanë dhe nuk do të jemi në gjendje të ruajmë kampet. Autoritetet turke kanë shënjestruar vendbanimet civile, stacionet e prodhimit të energjisë elektrike ose naftës. Kjo do të çojë në zhvendosje masive të njerëzve,” tha Abdi.
Në maj të këtij viti, Shqipëria dhe Kosova kryen operacionin e fundit të riatdhesimit të shtetasve të tyre nga Siria dhe Iraku . Autoritetet njoftuan se katër gra dhe nëntë fëmijë të moshës nga 6 deri në 16 vjeç nga Shqipëria kanë mbërritur në aeroportin “Adem Jashari” të Prishtinës së bashku me shtetas të tjerë të Kosovës të arratisur nga kampet skëterrë.
Operacioni i riatdhesimit të shtetasve shqiptarë nga zonat e ish-konfliktit në Siri dhe Irak u krye në kuadër të bashkëpunimit dypalësh shqiptaro-kosovar dhe me mbështetjen e partnerëve amerikanë përmes koordinimit me selitë e tyre diplomatike në Prishtinë dhe Tiranë.
