Dyshohet se u trafikua e u shfrytëzua për prostitucion nga motra e saj. Mirëpo, një gjë të tillë 16 vjeçarja e mohon kategorikisht.
Kjo e fundit thotë se nuk mban mend asgjë nga momenti kur më 15 janar, policia e kishte arrestuar motrën V.H dhe të dashurin e saj E.S, teksa ndodheshin në vilë bashkë me një shoqe 16 vjeçare, raporton Kiks Kosova.
E mitura, e cila dyshohet të jetë viktimë e trafikimit, tregon se në shtëpinë e saj kishin ardhur edhe përfaqësues nga Qendra për Punë Sociale.
Kjo e fundit thotë se shoqja e saj nga Prishtina, e cila ndodhej bashkë me ta në vilë, gjendet në strehimore.
Sipas saj, e mitura i kishte thënë se aty ndjehej më sigurt, pasi që ka frikë se të pandehurit mund t’iu hakmerren, për shkak se kishte lajmëruar policinë.
Njëjtë si motra, edhe e mitura e kishte lënë shkollën në klasë të 11.
Ndërkaq nëna e të dyshuarës dhe viktimës nuk ia ka idenë se përse Policia e Kosovës ia ka shqiptuar masën e arrestit shtëpiak vajzës së saj.
S.S tregon se në fund të vitit të kaluar, dy prej shoqeve të së bijës së vogël, të cilat dyshohen të jenë detyruar nga vajza dhe dhëndri i saj të kryejnë shërbime seksuale për klientët në këmbim të parave, i kishin shkuar në shtëpi, por kjo i kishte përzënë.
Nëna e vajzës që po dyshohet për “trafikim me njerëz”, ka njoftuar se ka 7 fëmijë, derisa bashkëshorti i kishte vdekur vite më parë.
Nga Qendra për Punë Sociale në Ferizaj i thanë Kiksit se të miturës i është caktuar një psikolog klinik si dhe është propozuar strehimi i saj në një institucion të sigurt.
Megjithatë, e mitura dhe nëna e saj kanë refuzuar këtë mundësi për strehim dhe kanë kërkuar që ajo të qëndrojë në familje. /Klankosova.tv
