Ndeshja e xhiros së fundit në Superligën e Kosovës në hendboll mes Vushtrrisë dhe Trepçës u përcoll me incidente, ku lojtarët e të dyja klubeve u përleshën mes vete.
Hendbollistët mitrovicas u sulmuan nga lojtarët dhe tifozët e Vushtrrisë, teksa nga policia e Kosovës kanë dhënë detaje të reja nga kjo rrahje masive.
Sipas raportit 24 orësh, gjashtë persona kanë pranuar tretman mjekësor, ndërsa thuhet se lidhur me rastin janë ndërmarrë të gjitha veprimet e nevojshme për procedura të mëtejme.
”LËNDIM I LEHTË TRUPOR. Vushtrri 22.04.2023 – 18:00. Raportohet se gjatë një ndeshje sportive ka ardhur deri te përleshja në mes të disa personave, përveq kësaj disa persona të tjerë kanë hedhur gjësende në drejtim të tyre. Si pasojë, gjashtë persona kanë pranuar tretman mjekësor. Lidhur me rastin janë ndërmarrë të gjitha veprimet e nevojshme për procedura të mëtejme,” thuhet në raport.
Ndryshe, tre hendbollistët e Vushtrrisë janë shpallur fajtorë për sulmin e rëndë ndaj lojtarëve të Trepçës dhe janë përjashtuar përjetë nga hendbolli. Komesari i Garave të Federatës së Hendbollit të Kosovës, Isak Osmani, mori vendimin të dielën mbrëma.
