Kryeministri i Shqipërisë, Edi Rama, e ka falënderuar presidentin e Francës, Emmanuel Macron, dhe kancelarin e Gjermanisë, Olaf Scholz, për kontributin që janë duke dhënë në finalizimin e procesit të normalizimit të marrëdhënieve mes Kosovës dhe Serbisë.
Kjo deklaratë e Ramës erdhi pas takimit që sot patën presidentja Vjosa Osmani dhe presidenti serb, Aleksandar Vuçiq, i nisur nga Macron dhe Scholz ku diskutuan për situatën në veri të Kosovës.
“T’i shoh ata të ulur në tavolinë në takimin e sotëm me aq respekt për të dyja palët, në përpjekje për të zgjidhur një konflikt absurd tregon gjithçka për shpirtin e tyre të madh evropian. Faleminderit!”, ka thënë Rama në një cicërimë në Twitter.
Më tej, ai ka komentuar edhe paraqitjen e presidentes Vjosa Osmani, duke e përgëzuar për diskutimin e saj ballë për ballë me Vuçiq, si dhe i ka përmendur kërkesat e Bashkimit Evropian që sot janë bërë në takim ndaj liderët të Prishtinës dhe Beogradit.
“E përgëzoj edhe Vjosa Osmanin që foli drejtpërdrejt me Aleksandar Vuçiqin dhe shpresoj me të vërtetë që këto tri kërkesa të plotësohen menjëherë në mënyrë që ky konflikt absurd të përfundojë para se të dëmtohet reputacioni i Kosovës dhe integrimit të saj të mëtejshëm në komunitetin demokratik”.
Pos këtyre, ai ka falënderuar edhe shefin e Politikës së Jashtme të BE-së, Josep Borell, për pjesëmarrjen në takimin e cekur më lartë, si dhe për kërkesat që i shprehu aty.
“Një falënderim të madh kam gjithashtu edhe për Josep Borell për pasionin dhe durimin e tij në ndihmën që e ka dhënë për të bërë që kjo gjë historike më në fund të ndodh”, ka thënë Rama.
