Dega e PDK-së në Gjilan denoncoi publikisht tenderin e Komunës së Gjilanit, për punësimin e 46 personave në QKMF.
Sipas PDK-së, ky tender gjysmë milionëshi shkel rëndë ligjin e prokurimit dhe kontratën me operatorin ekonomik “KosovaMed”.
“I bëjmë thirrje publike Prokurorisë Themelore në Gjilan që të iniciojë procedurën hetimore ndaj kryetarit të komunës A.H. lidhur me shkeljet e rënda ligjore të prokurimit dhe të financave publike, përmes keqpërdorimit me tenderët e dhënë, me kontratat e kundërligjshme, me punësimet familjare dhe me abuzimet e shumta financiare.
Njëri nga rastet eklatante ka të bëjë me këtë tenderë. Komuna e Gjilanit ka shpallur tender për punësimin e mjekëve dhe infermierëve në QKMF dhe kryetari i komunës më datë 24 shtator 2024 e nënshkroi kontratën me operatorin ekonomik “KOSOVAMED” nga Prishtina në vlerë prej 449,683.20 euro. Ky projekt nuk ka qenë fare i planifikuar në buxhetin e komunës për vitin 2024 dhe as në planin vjetor të punës së prokurimit në Gjilan”, thuhej mes të tjerash, në reagimin e PDK-së, përcjell Gazeta Papirus.
Sipas tyre, kryetari i komunës ka shkelur ligjin e prokurimit dhe kontratën, duke i kërkuar kompani punësimin e 46 personave, kështu duke e tejkaluar gati dyfishin e kontratës.
Ndaj kësaj akuze ka reaguar drejtori i Shëndetësisë në Gjilan, Hekuran Rapuca.
Rapuca i ka quajtur “shpifje publike të orkestruara” këto deklarime të PDK-së, duke thënë se dega e kësaj partie në Gjilan, po mundohet të manipulojë qytetarët.
“Angazhimi i profesionistëve shëndetësorë në QKMF përmes operatorit ekonomik “KOSOVAMED” është bërë në mënyrë të përkohshme dhe urgjente, për të mbuluar mungesat evidente në staf dhe për të garantuar funksionimin e shërbimeve bazike për qytetarët. Ky staf është angazhuar bazuar në nevoja konkrete dhe reale, jo në baza partiake, siç ka qenë praktikë për dekada nga pushtetet e mëhershme”, shkroi Rapuca.
Kështu vijon reagimi i tij publik:
Është skandaloze që individë si Riad Rashiti, të cilët kanë ushtruar presion të drejtpërdrejtë mbi kompaninë fituese të tenderit duke kërkuar punësimin e personave me inicialet V.I dhe A.J., sot dalin në opinion si “mbrojtës të ligjshmërisë”. Kjo përbën ndërhyrje flagrante dhe të papranueshme në një proces kontraktual, dhe tregon se për disa, gjithçka rrotullohet rreth interesave personale dhe partiake.
Riad Rashiti është kryetar i PDK-së në Gjilan, jo përfaqësues institucional i shëndetësisë. Ai nuk ka asnjë autoritet për të ndikuar apo diktuar vendime në Drejtorinë e Shëndetësisë, dhe çdo përpjekje e tij në këtë drejtim është ndërhyrje politike që synon ta kthejë këtë drejtori në vegël të partisë së tij.
Ne nuk do të lejojmë që përpjekjet tona për të ndërtuar një sistem më funksional, profesional dhe transparent të përbalten nga ata që janë mësuar me praktika klienteliste dhe trysni mbi institucione. Të gjitha procedurat janë ndjekur në përputhje me rregullat, dhe ne jemi të hapur për çdo hetim, auditim dhe vlerësim institucional.
Drejtoria e Shëndetësisë nuk është pronë e askujt dhe nuk do të përdoret për lojëra politike. Mjaft më me manipulime dhe pengesa për shërbime që u takojnë qytetarëve.
