Kryetari i komunës së Prishtinës, Përparim Rama, në rrjetin social “Facebook”, ka postuar disa foto, ku vërehet se po punohet në tunelin e kurrizit në lagjen “Dardania”.
Gjatë tetorit të vitit të kaluar, kanë filluar punimet për renovimin e tunelit të kurrizit. Rama, para pesë muajsh, ka njoftuar se ky projekt do të bëjë përmirësimin e qarkullimit dhe të infrastrukturës.
“Rritja e sigurisë për këmbësorë, biciklistë dhe vozitësit e automjeteve; Përmirësimi i infrastrukturës së përgjithshme, përfshirë ndriçimin, largimin e ujërave atmosferik dhe largimin e gazrave të emetuara nga automjetet dhe bizneset ekzistuese, duke krijuar një hapësirë të re për qytetarët”, ka shkruar ai.
Sipas planit të tij, ky tunel do të shndërrohet në një qendër aktive, për aktivitete kulturore dhe komerciale.
“Tuneli do të shndërrohet në një qendër aktive për aktivitete kulturore dhe komerciale. Do të organizohen koncerte, ekspozita dhe festivale, duke sjellë një atmosferë të re në qytet. Përveç kësaj, tregjet e fermerëve dhe panairet lokale do të bëjnë këtë zonë një pikë të rëndësishme takimi për qytetarët”, ka shkruar Rama.
