Një bar për trajtimin e hipertensionit pulmunar ka një vit qëkur mungon në Qendrën Klinike Universitare. Ai ndodhet në listë esenciale, por autoritetet nuk e kanë regjistruar në Kosovë. Për pasojë, prindi i një fëmije që duhet të kurohet me medikamentin Bosentan, ka thënë se detyrohet që të gjejë rrugë alternative për ta siguruar atë jashtë shtetit.
Që prej një viti, në Qendrën Klinike Universitare (QKUK) ka munguar ilaçi i listës esenciale “Bosentan”, i cili është i nevojshëm për trajtimin e sëmundjes së hipertensionit pulmunar, e njohur si presion i lartë i gjakut në arteriet e mushkërisë.
Prindër të fëmijëve me këtë sëmundje kanë thënë se në mungesë të medikamentit janë detyruar që ta blejnë atë vetë.
“Reparti i Pediatrisë na ka thanë që nuk ka dhe ju njoftojmë kur do të vijë. Domethënë nuk na e kanë ndërprerë shpresën që do të vijë, por për momentin nuk ka. Dhe kjo ka zgjatur përafërsisht një vit… tash detyrohemi të gjejmë rrugë alternative për ta gjetur atë… Çmimi i saj, neve na ka kushtuar rreth 300 euro, po thuhet që është edhe më shtrenjtë, por tash këtë çmim e kemi gjetur ne”, ka thënë Nderim Gashi, prind i një fëmijë.
Ai ka thënë se, përveç kostos financiare, sfidë përbën edhe sigurimi i ilaçit në Kosovë.
“’Bosontani’ nuk është në tregun farmaceutik këtu në Kosovë. Këtu nuk ekziston as për ta blerë, dhe duhet të blihet jashtë, jashtë Kosovës faktikisht. Ne jemi munduar të gjejmë zgjidhje dhe disa na e kanë preferuar që në Turqi ka, edhe e kemi marrë në Turqi. Qoftë kemi shkuar vetë, qoftë nëpërmes ndonjë miku që i ka rastisur puna atje në Turqi. Se çmimi… ia bëjnë diqysh njerëzit, por udhëtimi, të gjesh lidhje me shtete të tjera për ta gjetur se në Kosovë nuk ka as për ta blerë. Ky është problem serioz”, ka thënë Gashi.
E, ndonëse medikamenti është pjesë e Listës së barnave esenciale, të cilën e ka hartuar Ministria e Shëndetësisë, ai nuk është i regjistruar në Kosovë. Në QKUK e kanë përmendur këtë si arsye përse ilaçi nuk mund të kontraktohet.
“Produkti ‘Bosentan’ nuk është i regjistruar në Republikën e Kosovës, pra nuk kemi si ta sigurojmë këtë produkt, përderisa nuk posedon certifikatën e Autorizim-tregtimit”, kanë thënë në QKUK.
Për mungesën e medikamentit dhe për mosregjistrimin e tij, KOHA ka adresuar pyetje në Ministrinë e Shëndetësisë dhe në Agjencinë për Produkte dhe Pajisje Medicinale, por kanë munguar përgjigjet.
