Kryetari i Aleancës për Ardhmërinë e Kosovës, Ramush Haradinaj ka thënë që mocioni i mosbesimit ndaj Qeverisë mbetet ende opsion pasi sipas tij kjo është mënyra e duhur për rrëzimin e Qeverisë së udhëhequr nga Albin Kurti.
Sipas tij, opozita i ka numrat për të iniciuar mocionin dhe tha se shpreson se do të arrijnë unitet.
“Mocioni është mënyra më e duhur dhe legjitime, është demokraci. Aktualisht opozita i ka votat sa me e iniciu mocionin, pastaj duhet ndihma e deputetëve të tjerë. Shpresoj që në një rrethanë të caktuar do ta arrijmë unitetin brenda opozitës, por po është opsion”, tha Haradinaj.
Ai po ashtu tha se zgjidhja e duhur për vendin do të ishte tërheqja e kësaj Qeverisë.
“Në Parlament pra Kurti dhe Qeveria e tij ka shumë llogari me dhënë, para kuvendit, para Kosovës. Po shpresoj po ashtu që gjitha këto zhvillime e kanë një fund e që fundi është që të shkojë në shtëpi Qeveria Kurti”, tha ai.
Pas kësaj, ai u pyet nga gazetarët se “Çfarë nëse nuk shkon Qeveria Kurti?”
“Shkon, shkon”, është përgjigjur Haradinaj.
Më tutje Haradinaj deklaroi se ka thirrje që Qeveria të kthehet me aleatët.
/GazetaPapirus/
