“Partitë i kanë strategjitë e tyre të negocimit, por pa dyshim që kryeministër i Kosovës do të jetë z. Bedri Hamza”, ka thënë Qalaj.
Ai theksoi se përveç përkrahjes që Hamza gëzon nga qytetarët, ai është i respektuar edhe nga kolegët e partive të tjera në Kuvendin e Kosovë.
Sipas Qalajt, mungesa e një zhbllokimi politik lidhet drejtpërdrejt me frikën e kryeministrit të dorëhequr Albin Kurti, se do ta humbte pozitën.
“Arsyeja pse nuk kemi zhbllokim është pikërisht frika e z.Kurtit se nuk do t’i ketë numrat dhe se do të bëhet kryeministër Bedri Hamza”, shtoi Qalaj
Ai ka renditur disa arsye përse nuk po e votojnë kandidaten e propozuar për pozitën e kryekuvendares nga Lëvizja Vetëvendosje, Albulena Haxhiu.
Ai ka theksuar sjelljen e Haxhiut gjatë periudhës kur ajo ka qenë në opozitë, e cila, sipas tij, ka qenë shumë agresive dhe me fjalë të papërshtatshme për kundërshtarët politikë.
Po ashtu, Qalaj ka kritikuar Haxhiun për iniciativën e saj që ka çuar në zvogëlimin e fondeve për mbrojtjen e ish-pjesëtarëve të UÇK-së.
“Sjellja e saj që nga koha kur ka qenë në opozitë ka qenë shumë agresive dhe me fjalë nga më banalet ndaj kundërshtarëve të saj politikë. Ju e dini sjelljen e saj ndaj kryetarit të atëhershëm të Kuvendit, z. Kadri Veseli. Një tjetër barrierë e madhe është çështja e zvogëlimit të fondeve për mbrojtjen e të akuzuarve në Hagë. Ajo ka qenë iniciatore që këto fonde të zvogëlohen dhe kjo ka dëmtuar shumë mbrojtjen e Thaçit, Veselit, Krasniqit dhe Selimit”, deklaroi Qalaj.
