Partia Socialdemokrate (PSD) ka reaguar pas arrestimit të liderit të kësaj partie, Dardan Molliqaj dhe të disa aktivistëve të tjerë në zyrat e ZRrE-së.
Kjo parti ka kërkuar lirimin e menjëhershëm të Dardan Molliqajt dhe të aktivistëve të tjerë.
PSD kërkon lirimin e menjëhershëm të aktivistëve të saj, përfshirë edhe kryetarin e saj, z. Dardan Molliqaj. Arrestimi i tyre përbën një veprim që kundërshton të drejtën për të protestuar dhe kërkuar që vendimet që na prekin të gjithëve të mos qëndrojnë të fshehura publiku. Përdorimi i dhunës së shtetit në shërbim të fshehjes së dokumenteve publike është një tregues i natyrës së pushtetit që sot është vendosur në vend”, është thënë në reagimin e PSD-së.
Reagimi i plotë i PSD-së:
ARRESTIMI I AKTIVISTËVE TË PSD-së ËSHTË VEPRIM ANTIDEMOKRATIK
Protesta e jonë sot pranë zyrave të ZRrE-së kishte vetëm një qëllim – që vendimi përmes së cilit është bërë rritja enorme e faturave të energjisë elektrike të bëhej publik. Përderisa çmimin e lartë e të papërballueshëm për shumicën e qytetarëve të Kosovës na e kanë treguar menjëherë, shumë prej çështjeve dhe rrethanave që lidhen me këtë vendim qëndrojnë të panjohura, përfshirë këtu edhe vet vendimin.
Protesta jonë e sotme ishte kërkesë për transparencë. Kjo mungesë transparence po minon çdo mundësi që t’i kundërvihemi padrejtësisë sociale të tarifave të reja të energjisë. Për më tepër, mospublikimi i këtij vendimi bie ndesh edhe me legjislacionin në fuqi.
PSD kërkon lirimin e menjëhershëm të aktivistëve të saj, përfshirë edhe kryetarin e saj, z. Dardan Molliqaj. Arrestimi i tyre përbën një veprim që kundërshton të drejtën për të protestuar dhe kërkuar që vendimet që na prekin të gjithëve të mos qëndrojnë të fshehura publiku. Përdorimi i dhunës së shtetit në shërbim të fshehjes së dokumenteve publike është një tregues i natyrës së pushtetit që sot është vendosur në vend.
