Mashtrimet kompjuterike po bëhen gjithnjë e më të sofistikuara, duke vënë në shënjestër individë dhe biznese që kryejnë transaksione të mëdha financiare. Përmes sulmeve kibernetike dhe manipulimit të komunikimeve elektronike, mashtruesit arrijnë të përvetësojnë shuma të konsiderueshme parash. Një rast i tillë është raportuar të mërkurën në Prishtinë, ku një biznesmen ka humbur një shumë të majme parash, raporton Gazeta Sinjali.
Si rezultat i denoncimit, Policia dhe Prokuroria kanë nisur hetimin, ndërsa Sinjali ka zbuluar detaje ekskluzive.
Burimet e Sinjalit brenda Prokurorisë kanë bërë me dije se biznesmeni që ra pre e këtij mashtrimi është Bujar Guci, pronar i kompanisë “Unisolar LLC”, i cili ka humbur hiç më pak se 190 mijë euro përmes një transferi bankar të manipuluar nga mashtrues kibernetikë.
Sipas merr vesh Gazeta Sinjali, para disa ditësh, Guci kishte iniciuar një pagesë ndërkombëtare nga “Raiffeisen Bank” në drejtim të kompanisë “Jinko Solar”. Megjithëse transaksioni fillimisht ishte sinjalizuar si i dyshimtë nga banka, ai ishte miratuar me pakujdesi nga vet pronari.
Dosja e rastit thotë se fondet u transferuan përmes bankës ndërmjetësuese “Deutsche Bank” dhe përfunduan në një llogari të “UniCredit” në Gjermani.
Por, dyshimet për mashtrim lindën më 17 mars, kur Guci vërejti se pagesa nuk ishte bërë në llogarinë zyrtare të kompanisë “Jinko Solar”, por në një llogari private në emër të një personi të panjohur. Pas kontaktit me zyrtarët e “Jinko Solar”, u konstatua se biznesmeni ishte viktimë e kësaj skeme mashtrimi.
Sipas të njëjtave burime, mashtruesit kanë manipuluar adresat e e-mailit, duke krijuar kopje të ngjashme me ato të “Jinko Solar” dhe kanë arritur që të kapin paratë në mënyrë të kundërligjshme.
Lidhur me rastin, Policia e Kosovës dhe hetuesit e Njësisë për Hetimin e Krimeve Kibernetike janë duke zhvilluar hetime, në koordinim me Prokurorin e Shtetit.
Gazeta Sinjali ka kontaktuar kompaninë që të marrë një deklaratë edhe nga pronari, ku është përgjigjur një punonjëse e cila premtoi se do ta dërgojë numrin kontaktues të Gucit.
Sinjali do të iu mbajë të informuar me detajet e reja
