Pajisja përgjuese GPS-së që gazetari Vehbi Kajtazi e kishte gjetur në veturën e tij në fund të tetorit të vitit të kaluar është e Agjencisë së Kosovës për Inteligjencë, e njohur gjerësisht si AKI.
Se kjo pajisje i takon AKI-së tashmë e ka konfirmuar edhe Prokuroria e Kosovës.
Pas një kërkese për të dhëna nga Dogana e Kosovës është konfirmuar se aparati që iu gjet Kajtazit në veturë është një nga 74 pajisjet e njëjta që kishin ardhur në Kosovë si material i porositur për AKI-në.
Sipas burimit në Doganën e Kosovës, pas kërkesës, Dogana ia ka ofruar këto të dhëna Prokurorisë.
Në postimin e tij në facebook, Lirim Mehmetaj ka ndarë këtë informacion ekskluziv duke shkruar:
“Nga ajo që deri më tani aktualisht kam marrë vesh – çuditërisht – askush nga palët nuk është i interesuar shumë të vazhdohet me rastin deri në zbardhje të plotë të përgjegjësve që ilegalisht përcjellën gazetarin.
Përndryshe, me një pajisje të njëjtë jam përcjellur edhe unë për një kohë.
Unë personalisht, përveç se kërkoi zbardhje të rastit deri në detaje që përgjegjësit të ballafaqohen me drejtësinë, tash, pasi veç kanë përgju për një kohë, bëj thirrje publike që të publikohen të gjitha përgjimet që më janë bërë mua.”- ka shkruar ai.
