Dhuna në familja vazhdon të mbetet një ndër dukuritë më shqetësuese në vend, ku zakonisht viktima janë gratë të cilat dhunohen në forma të ndryshme kryesisht nga bashkëshortët e tyre, por edhe nga anëtarët e tjerë të familjes. Ato madje nuk ‘kursehen’ nga sulmet as gjatë muajve të shtatzënisë, duke qenë kështu në rrezik të madh.
Një rast i rëndë dyshohet të ketë ndodhur dje në një familje në rrugën ‘Bingeni’ në Prizren, ku një burrë dyshohet se ka ushtruar dhunë fizike ndaj bashkëshortes së tij e cila është shtatzënë.
Sinjali mëson e gjithë ngjarja dyshohet të ketë ndodhur pas një konflikti verbal mes tyre. Viktima është dërguar në spital ku ka marrë ndihmë mjekësore, ndërkohë që rastin e ka denoncuar edhe në Polici.
I dyshuari është arrestuar dhe është shoqëruar në stacion, ku para hetuesve policorë ka mohuar të ketë sulmuar fizikisht gruan e tij, por ka deklaruar se kanë pasur vetëm zënkë.
Me urdhër të prokurorit, rasti është iniciuar ‘Dhunë në familje’.
