Një nga ndeshjet me rivalitetin më të madh viteve të fundit në Superligën e Kosovës ka qenë Prishtina dhe Ballkani. Sot këto dy skuadra përballen me njëra-tjetrën në kuadër të xhiros së 23’të në stadiumin ‘Sami Kelmendi’ në Lipjan nga ora 13:00.
Kryeqytetasit nuk po kalojnë momente të mira gjatë stinorit pranveror. Javën e kaluar kundër Llapit regjistruan fitoren e parë pas tre humbjeve radhazi.
E njëjta gjë nuk mund të thuhet për skuadrën e udhëhequr nga Ilir Daja. Kampioni në fuqi i Kosovës nuk dinë për humbje që nga 10 nëntori i vitit të kaluar. Llapi e kishte mposhtur në shtëpi me rezultat të thellë 1-4.
Por, edhe në ndeshjet e fundit mes Prishtinës dhe Ballkanit kanë qenë këta të fundit që kanë korrur rezultate më pozitive.
Në shtatë përballjet e fundit mes tyre bardhëekaltrit nuk kanë arritur të shënojnë fitore. Fitorja e fundit daton më 4 prill 2021.
Gjatë kësaj kohe suharekasit kanë triumfuar në gjashtë takime, teksa një tjetër ka përfunduar barazim.
Momentalisht dy klubet po luftojnë për objektiva të ndryshëm. Ballkani kërkon titullin kampion, kurse Prishtina një vend që dërgon në Europë.
Portokallezinjtë janë në pozitën e parë me 48 pikë, derisa skuadra e udhëhequr nga Ismet Munishi në vendin e katërt me 30 sosh.
