“Të gjithë çohen nga karriget e tyre kur flet (Ministrja e Jashtme e Kosovës) Donika Gërvalla”, ka pretenduar Ministri i Punëve të Jashtme të Serbisë, Ivica Daçiq, duke folur në një intervistë për televizionin kryekëput propagandistik “Tv Pink”, siç e citoi RTV.
Madje Daçiq pretendon se në një takim të liderëve rajonalë në Bruksel, Donika Gërvallës “ia ka ndalur mikrofonin” Përfaqësuesi i Lartë për Politikë të Jashtme dhe Siguri i Bashkimit Evropian, Josep Borrell.
“Donika Gërvalla…kur flet të gjithë çohen nga karriget e tyre. Paraqitja e saj e fundit në Bruksel përfundoi me Borrellin duke ia ndalur mikrofonin. Nuk ndalon së sulmuari Serbinë, por sulmon edhe ndërmjetësit amerikanë dhe evropianë se s’i bëjnë presion Serbisë”, ka deklaruar ministri serb.
Ndërkaq për Kryeministrin e Kosovës, Albin Kurti, Daçiq u shpreh se në Athinë shkoi me qëndrimin se “Kosova është Ukraina, Serbia është Rusia”.
Duke folur edhe për takimet e Presidentit të Ukrainës, Volodymyr Zelensky, me të gjithë të tjerët prezentë në Samitin e Athinës, Daçiq tha se ishte “tejet e rëndësishme për Serbinë” që ndodhi ashtu.
“Është shumë e rëndësishme që ta dëgjoni nga vetë zyrtarët ukrainas, sepse pavarësisht se keni deklaratat e disa deputetëve apo disa politikanëve në Ukrainë të cilët janë të udhëhequr nga një urrejtje e madhe ndaj Rusisë nga njëra anë, dhe fakti që Kosova po përpiqet të lobojë përmes tyre për një ndryshim të pozicionit të Ukrainës, do të thotë se qëndrime të tilla janë ende qëndrime individuale, dhe mendoj se ishte shumë e rëndësishme të kishim një takim me Zelenskiy-n”, tha Daçiq.
“Ukraina është një vend mik për ne, ne kurrë nuk kemi pasur probleme, na kanë ndihmuar kur ka pasur sanksione, kur ka pasur bombardime, dy popujt tanë janë shumë afër dhe ne e konsiderojmë tragjedi që ka pasur një konflikt midis Rusisë dhe Ukrainës; dhe dëshirat tona janë para se çdo gjë të bazohet në faktin që ajo të ndërpritet sa më shpejt dhe të përfundojë me bisedime dhe marrëveshje diplomatike”, tha Daçiq
