Presidentja e Kosovës, Vjosa Osmani në ditën e fundit të vitit ka vizituar, Klinikën Emergjente në Qendrën Klinike Universitare të Kosovës, Qendrën Operative Komunikuese Koordinuese, Stacionin “Qendra” të Policisë, si dhe Brigadën e Zjarrfikësve.
Në një komunikatë për media bëhet e ditur se Klinikën Emergjente, Osmani ishte e shoqëruar nga zëvëndësministrja e shëndetësisë, Dafina Gexha.
Në takim me drejtuesit dhe stafin, Presidentja Osmani ka uruar që gjatë kujdestarisë në ndërrimin e moteve të ketë sa më pak angazhim për ta, duke falënderuar të gjitha institucionet shëndetësore për punën që po bëjnë në menaxhimin e pandemisë. Ajo ka falënderuar gjithë stafin mjekësor që kujdestarojnë në natën e ndërrimit të motmoteve.
Në Qendrën Operative Komunikuese Koordinuese si dhe në Stacionin e Policisë “Qendra”, Osmani është shoqëruar nga ministri i Brendshëm, Xhelal Sveçla dhe drejtori i përgjithshëm i Policisë, Samedin Mehmeti.
Ajo ka përgëzuar Policinë e Kosovës për angazhimin përgjatë këtij viti, duke potencuar posaçërisht punën e tyre për sigurinë e qytetarëve por edhe ndihmën që kanë dhënë në menaxhimin e pandemisë. Ndërkaq në vizitë te Brigada e Zjarrfikësve, Presidentja ka vlerësuar angazhimin e tyre me shpresën se nata festive do ta kalojë pa pasur nevojë për ndërhyrjen e tyre.
Në të tri institucionet, të cilat do të kujdestarojnë në ndërrimin e viteve, Presidentja i ka uruar dhe i ka inkurajuar ata për punën që bëjnë për sigurinë qytetare në festat e fundvitit me urimin që viti 2022, të jetë vit i sukseseve jo vetëm për ata, por për gjithë shtetin e Kosovës./Lajmi.net/
