Presidentja Vjosa Osmani është deklaruar edhe rreth zërave për zgjedhje të parakohshme në vend.
Osmani ka thënë se nuk parashihet që të ketë zgjedhje të parakohshme, pasi që sipas saj, ka stabilitet politik.
“Nuk i paskam dëgjuar zërat e tillë për mbajtje të afërta të zgjedhjeve. Shoh një stabilitet politik, që nuk e kemi parë që një kohë të gjatë, i cili dëshmohet jo veç në numrat që janë në Kuvend, por edhe në projektet afatgjate që janë planifikuar”, ka thënë Osmani në një konferencë për medie.
Duke pasur parasysh edhe partneritetin e fuqishëm të Kosovës me vendet mike, Osmani ka thënë se nuk mendoj se një gjë e tillë është afër.
“Edhe për shkak se e shoh një partneritet të fuqishëm në mes Kosovës e vendeve mike, kur i shoh gjithë këto elemente bashkërisht, nuk mendoj që një gjë e tillë është afër”, shtoi ajo.
