Shefi i stafit të Presidencës së Kosovës, Blerim Vela, ka thënë se tani në veri po digjen veturat e serbëve të cilët konsiderohet se po bashkëpunojnë me institucionet e Kosovës.
Një qytetar ka raportuar të shtunën në Polici se dikush i ka vënë flakën tri veturave të tij, të cilat siç ka konfirmuar Policia, nuk ishin me targa RKS
Vela ka shkruar në Twitter se çdo autor i këtyre veprave do të dalë para drejtësisë.
“Vazhdon fushata kriminale e djegies së veturave në veri të Kosovës! Tre vetura të tjera janë djegur herët në mëngjesin e sotëm. Strukturat ilegale të Serbisë tani po synojnë serbët vendas që ata konsiderojnë se po bashkëpunojnë me institucionet e Kosovës. Çdo autor do të dalë para drejtësisë!”, ka shkruar Vela.
Në veri, djegiet e veturave kanë nisur që nga fundi i vitit të kaluar kur disa serbë vendosën t’i konvertonin targat në RKS. Por ishte nga herët e rralla që sot veturat e djegura nuk ishin me targa RKS.
Policia e Kosovës ka arrestuar javën e kaluar një person, i cili dyshohet të ketë lidhje me djegiet e veturave dhe me sulmet ndaj Policisë në veri më herët.
