Problemet infrastrukturore po ua vështirësojnë jetën banorëve të fshatit Caravnik të Klinës.
Në Kiks Kosova, ata rrëfyen se telashet me makinat nuk po iu ndalen, e shpenzimet për rregullimin e tyre po janë të papërballueshme.
Ankesa për këtë rrugë patën për vite me radhë por sipas tyre askush nuk ua vuri veshin. Qytetarët kanë thënë se ndihmë kërkuan shpeshherë.
Në një intervistë për KIKS Kosovën, drejtori i Urbanizmit në komunën e Klinës, Enver Berisha heq nga supet e komunarëve peshën e përgjegjësisë për këtë rrugë.
Berisha ka thënë se kjo rrugë është rajonale, andaj kompetenca e rregullimit të saj i kalon Ministrisë së Mjedisit, Planifikimit Hapësinor dhe Infrastrukturës.
Drejtori i Urbanizmit e pranon se rruga ka dëmtime të mëdha dhe është nevojë e domosdoshme që të rregullohet.
Berisha ka treguar se ankesat që ai merr çdo ditë nga qytetarët në Kosovë janë shumta, mirëpo, thekson ai, që ata nuk po e din që rruga është rajonale dhe se nuk i lejohet komunës që të ndërhyjë.
Për rregullimin e kësaj rruge, drejtorit Enver Berisha e kryetarit Zenun Elezaj iu dhanë premtime tash e sa vite.
Për KIKS-in Berisha ka thënë se herën e fundit ishte zv. Ministri i Infrastrukturës, Hysen Durmishi i cili iu kishte premtuar që do gjente një zgjidhje në fundvitin e kaluar.
Si zyrtar komunal, drejtori Berisha ka thënë që në të shumtën e rasteve janë ndjerë të anashkaluar nga Qeveria, kur vinte puna për mbështetje financiare.
Kiks Kosova ka adresuar pyetje në postën elektronike të Ministrisë së Infrastrukturës, lidhur me gjendjen e kësaj rruge dhe premtimet e zëvendësministrit Durmishi, mirëpo deri në publikimin e kësaj kronikë, të njëjtit nuk kanë kthyer përgjigje.
