Analisti, Xhevdet Pozhari ka shkruar një status lavdërues për kryeministrin e Kosovës, Albin Kurti.
Me anë të një postimi në Facebook, Pozhari ka thënë se marshi për UÇK-në nuk ishte kundër kryeministrit Kurti.
“Disa u munduan ta shesin marshin për UÇK-në si protestë kundër Albin Kurtit!” – ka shkruar Pozhari.
Më pas, ai ka numëruar kontributet, sipas tij, historike të kryeministrit Kurti.
“Deri në këtë masë ka arritur mosdurimi i disa të mjerëve ndaj njeriut që: Në vitin 1999 u mbajt i burgosur nga Serbia dhe për dy vite e gjysmë u torturua mizorisht;
Protestoi kundër mbivendosjes së EULEX-it në sistemin e drejtësisë që mori miliarda euro për funksionimin e tij dhe në fund nuk pamë asnjë rezultat në sundimin e ligjit;
Kërkonte me ngulm fuqizimin e Gjykatave të vendit;
Kundërshtoi ashpër Gjykatën Speciale dhe lutej që të tjerët mos ta votonin;
Protestoi vazhdimisht kundër marrëveshjeve të dëmshme me Serbinë;
U arrestua me dhjetëra herë pavarësisht se gjithmonë ia ofronin mundësinë që të bëhej pjesë e pushtetit”, tha ai.
Tutje, Pozhari ka shkruar edhe për resistencën e pas luftës së Albin Kurtit.
“Refuzoi kategorikisht; Paralajmëronte para kohe të gjitha rreziqet që i kanoseshin vendit nga koalicionet që bëheshin pa asnjë kriter tjetër, pos qëllimit për të mbetur përjetësisht në pushtet.
Ata që e urrejnë kanë një arsye të fortë – Albin Kurti i përballë me dështimet e njëpasnjëshme. Thjeshtë, edhe pas 2 viteve qeverisje, dëshmon se nuk bën asnjë kompromis me të keqen. E vetmja përpjekje e tij është që ta nxjerrë Kosovën nga balta ku e kanë zhytur ata që ishin para tij.
Dhe, këtë po e bën kujdesshëm duke hedhur hapa të sigurtë, përkundër pasojave që solli pandemia dhe inflacioni që e solli lufta në Ukrainë”, ka vazhduar ai.
Në fund, Pozhari ka thënë se Kurtin e xhelozojnë rivalët e tij politik.
“Albin Kurti është veç modeli që kundërshtarët e tij politik do të donin të ishin. Në pamundësi për ta arritur, para së gjithash pastërtinë e tij, janë verbuar nga zilia”, ka përfunduar ai.
