Para disa ditësh, një qytetar i Vushtrrisë është paraqitur në Stacionin Policor të këtij qyteti për të dorëzuar një portofol (kuletë) të gjetur në rrugën “Shemsi Istrefi”, shkruan Gazeta Papirus.
Sipas njoftimit zyrtar nga Policia e Kosovës, qytetari ka deklaruar se portofoli është gjetur në rrugë dhe në të ka pasur një sasi të hollash, por nuk kishte asnjë dokument identifikues që do të ndihmonte në gjetjen e pronarit.
Pavarësisht përpjekjeve të deritanishme nga ana e policisë për të identifikuar personin që e ka humbur, deri në këto momente nuk është arritur të gjendet pronari i portofolit.
Policia ka vendosur të publikojë këtë informacion , me qëllim që personi që e ka humbur portofolin të njoftohet dhe të paraqitet në Stacionin Policor në Vushtrri, ose të kontaktojë në numrin emergjent 192.
“Nëse dikush mendon se ky portofol i përket atij apo asaj, ftohet të vijë në stacion për verifikim,” thuhet në njoftim.
Kush e ka humbur këtë kuletë me para? Misteri vazhdon – dhe ndoshta pronari as që e ka vërejtur ende mungesën e saj. Policia pret sinjalin e duhur, transmeton Gazeta Papirus.
